New Delhi : Pakistan ke Wazeer-e-Azam Imran Khan ke khilaaf hindustani team ke kayi sabiq aur moujooda khiladion ne tanqeed shuru kardi hai.
Hindustani fast bowler Mohammad Shami, Harbhajan Singh aur sabiq captain Azhar uddin ne Twitter par Imran Khan ke khilaaf tweet kiya hai.
Un sabhi cricket khiladion ne Imran Khan ko nafrat phelanay wala qarar diya hai. khayaal rahay ke Pakistani Wazeer-e-Azam ne aqwam-e-mutahidda general assembly mein apni taqreer ke douran Hindustan ko johri jung ki dhamki di thi.
Mohammad shami ne Imran Khan ke khilaaf tweet karte hue likha ke Mahatma Gandhi ne apni zindagi mohabbat, bhai charah aur aman ke paegham ko phelanay mein guzari wahein Imran Khan ne aqwam-e-mutahidda podium se dhamkian den aur nafrat phailai. Pakistan ko aisay qaied ki zaroorat hai jo taraqqi, mulazimat aur iqtisadiat ki baat kare nah ke jung aur dehshat gardi ko panah day.
Harbhajan singh ne tweet karte hue likha ke aqwam-e-mutahidda mein taqreer ke douran Hindustan ko mumkina johri jung ka ishara diya gaya. ek badey khiladi ke tor par Imran Khan ke lafz dono mumalik ke darmiyan sirf nafrat phailayinge. ek khiladi ke tor par mujhe unse umeed hai ke woh aman ko farogh denge.
Hindustan ke sabiq captain Azharuddin ne bhi Imran Khan ko unki taqreer ke liye tanqeed ka nishana banaya. Azharuddin ne tweet kiya ke aqwam-e-mutahidda mein jis Imran Khan ne taqreer ki hum inhen nahi jantay hain. kisi khiladi se iski umeed kam thi, mein ne sach mein socha tha ke aap tabdeeli laynge aur Pakistan ko dehshat gardon se pak banayen ge.
khayaal rahay ke sab se pehlay Imran Khan ke khilaaf Gautam Gambhir ne tweet kiya tha. unhon ne Imran Khan ko dehshat gardon ka role model bataya tha. gambhir ne tweet kiya tha ke ek khiladi ko role model maana jata hai, achay sulooq ka, akhlaqiaat ka, kirdaar ki mazbooti ka. haal hi mein hum ne ek sabiq khiladi ko bhi boltay dekha. dehshat gardon ke role model ke tor par. Imran Khan ko khel baradri se nikaal diya jana chahiye. –YTN STAFF