Indore: Punjab ke wazeer aur Congress ke Numayan Tasheer-kar Navjot singh sidhu neh Wazeer-e -azam Narendra Modi par tanqeed karte hue kaha Modi ne nojawanoun ko Pakode aur mulk ko Bhagode dainay ka kaam Kiya hai. Madhya pradesh ke Indore mein congress ke lok sabha umeed waar Pankaj Sanghavi ki himayat mein yahan ek intikhabi rally se khitaab karte hue apne khaas andaaz mein bayan baazi ke liye mashhoor Sidhu neh apne andaaz mein jam kar chokay chhakay lagaye. unhon neh Modi par ek ke baad ek ilzaam aed karte hue kaha ke Modi ko lagta hai ke 2014 ke pehlay Hindustan mein sirf ek chai ki dukaan thi. unhon neh kaha Modi congress ke azeem qaideen par nuqta cheeni karte waqt bhool jatay hain ke unhon neh hi Hindustan ko khalaa mein kamyabi, computer inqilab jaisi mutadid soghaten dee hain .
Unhon neh congress ki hukoomat ki husooliya bayan ka zikar karte hue kaha congress ne hi mulk bhar mein Aala taleem ke liye indian institute of management, indian institute of tecnology, kayi Universities aur tibbi sahoolat ke liye kayi aalmi satah ke dwakhane qaim kiye hain. sidhu neh Modi aur BJP par bunyadi masail se hatt kar intikhabi tasheer karne ka ilzaam lagatay hue kaha BJP intikhabi Platforms se jhoot phela rahi hai. yahi wajah hai aaj baat note bandi, good and service tax ( GST), rozgaar, kisaan, gurbat ki baat nahi karte hue Modi qoum parasti ki panah mein chalay gay hain. Punjab hukoomat ke wazeer sidhu neh Modi par ilzaam aed karte hue kaha guzashta paanch barson mein aaeni idaron ka siyasi ghalat istemaal Kiya gaya, kuch sanat karon ki zaati units ko faida pohnchanay ke maqsad se musalsal markazi units ko khatam Kiya ja raha hai .-YTN STAFF