Hyderabad: Wazeer-e-azam Hind Narendra Modi corona vaccine ki tayari ke marhala ka jaiza lainay aur maloomat haasil karne ke liye Hyderabad pohanche.
Ahmedabad mein is vaccine ki tafseelaat ka jaiza lainay ke baad woh seedhay telangana ke dar-al-hukoomat Hyderabad pohanche.
Hakeempet airforce station par cheif secretary somesh kumar, DGP Mahendra reddy, Shweta mohanty ke commissionaire VC sajjanar aur hakeempet air force commanders ne unka istaqbaal kiya.
Modi airport se seedhay Bharat biotech company pohanche jahan unhon ne sciencedanon se corona teeka ki tayari ke marhala aur is se mutaliq challenges ke baray mein maloomat haasil kee. Modi ne is dora ke douran science danon se baat cheet ki aur teeka ki tayari, awam ko iski dasteyabi aur is se mutaliq challenges ke baray mein maloomat haasil kee. Mulk mein covid-19 ke teeka ki tayari ke iqdamaat ke jaiza ke maqsad se shehron ke apne seh roza dora ke ek hissa ke tour par wo hyderabad pohanche.
Indian council of medical reserch ke ishtiraaq se hyderabad ki Bharat biotech company ki janib se is teeka ki tayari ka kam kiya jarha hai. Bharat biotech company ke ohdedaron ki janib se wazeer e azam Modi ko tafsila t- se waaqif karwaya gaya. Is teeka ke insanon par tajurbah ka teesra marhala haal hi mein shuru hua.
Doosri janib telangana congress ke karguzar saddar wo rukan-e-parliment revantth ready ne kaha hai ke yeh afsos ki baat hai ke muqami rukan-e-parliment honay ke bawajood un ko wazeer e azam ke dora hyderabad ki ittila nahi di gayi aur na hi madoo kiya gaya jis ki woh speaker se shikayat karenge. Unhon ne media se baat karte hue kaha kay wazeer e azam ka dora shakhsi nahi hai, unko un ke dora ki ittila na dena awaami numainda ki tauheen aur protocol ki khilaaf warzi aur riwayat shikni hai. Unhon ne kaha ke is masla ko woh lok sabha mein bhi uthayenge.
Wazeh rahay ke doosri taraf is martaba Modi ke dora hyderabad ke mauqa par daftar wazeer-e-azam ne ek ghair mamooli aur chonka dainay walay qadam ke tour par kaha ke wazeer e azam ke istaqbaal ke liye airport par chief minister ko anay ki zaroorat nahi hai. Aam tor par jab Wazeer e Azam riyasat ke dora par aatay hain to riyasat ke awam ki janib se chief minister aur reyasti wuzra ki janib se unka istaqbaal kiya jata hai.
Telangana ke chief minister KCR is martaba bhi aisa hi karna chahtay thay. reyasti hukoomat ne bazabta tor par Wazeer e Azam ke daftar ko mutala kiya hai ke KCR , Wazeer e Azam Narendra Modi ka istaqbaal karenge jo hafta ki sah pehar hakeempet airport pohachanay walay hain taham jummay ki shaam wazeer e azam ke daftar se Narendra Modi ke assistant vivek ne telangana ke
chief secretary somesh kumar se phone par rabita kiya aur kaha ke Wazeer e Azam ke istaqbaal ke liye KCR ko anay ki zaroorat nahi hai.