New Delhi: Hindustan ke Wazeer-e-Azam Narendra Modi ne America ke nou-muntakhib saddar Biden se telephone par baat karkay unhein intikhabaat mein kamyabi aur sadar Muntakhab honay par mubarakbaad di hai.
Modi ne Amrici sadar muntakhib honay par Biden ko gur-majoshi ke sath mubarakbaad di aur kaha ke is intikhabaat se Amrici jamhoori riwayaat ke istehkaam ka pata chalta hai.
Wazeer e Azam Hind ne America ki no muntakhib naib sadar kamla haris ko bhi mubarakbaad di aur naik khwahisaat ka izhaar kiya. Is mauqa par Modi ne 2014 aur 2016 ke apne Amrici doray ka zikar karte hue Biden ke sath apni mulaqaat ko bhi yaad kiya.
Dono rehnumaon ne mushtarqa eqdaar aur yaksaa mafadaat par mabni Hindustan. America aalmi strategic shiraakat daari ko mazeed mustahkam karne ke liye kaam karne par ittafaq raye zahir kiya. Modi ne corona waba se nimatnay ke liye sasti vaccine muhaya karwane, mosmyati tabdeeli ke challenge se nimatnay aur behar-ul-kahal ke khittay mein taawun mein izafah karne jaisi tarjeehat ke baray baat cheet ki.
Alawa azeen Wazeer e Azam Narendra Modi ne Gujarat ke zila Varodra mein sadak haadsay mein 11 afraad ki mout par izhaar dard vo gham kiya hai. Modi ne ek tweet pegham mein kaha Varodra mein hue sadak haadsay se dukhi hoon. Is haadsay mein apne ahal-e-khanah ko khone walon ke taain meri taaziyat hai. Dua hai ke is haadsay mein zakhmi honay walay jald sehat yaab hojayen. Jaye haadsa par intizamia har mumkin taawun kar rahi hai. Qabil-e-zikar hai ke varodra mein aaj subah ek tempo aur trailor mein takkar hogayi jiske nateejay mein kam azkam 11 afraad ki mout hogayi aur deegar afraad zakhmi hogaye.