New Delhi: Wazeer-e-azam Narendra Modi ne Bharatiya janata party ke senior leadroun mein shumaar Laal Krishan Advani ki rehaish gah par jaakar aaj unki saalgirah par inhen mubarakbaad di.
Modi ke hamrah markazi wazeer-e-dakhla Amit Shah aur BJP ke karguzar saddar JP Nadda bhi they. Wazeer-e-Azam ne Advani ko phooloun ka guldasta pesh kiya aur teenoun leadroun ne inhen saalgirah par mubarakbaad di.
Modi is douran Advani ke ghar mein kuch der ruke aur unse baat cheet ki. Daren-asna naib sadar jamhooriyah M.Venkaiah Naidu bhi wahan pohanch gaye aur unhon ne bhi Advani ko saalgirah ki mubarak baad di. is se qabal Wazeer-e-azam ne aaj tweet karke Advani ko saalgirah par mubarak baad di.
Modi ne Tweet karke kaha Advani jee ke liye awaami khidmaat hamesha eqdaar se munsalik rahi. unhoun ne kabhi bhi apne bunyadi nazriya ko lekar samjhota nahi kiya. Wazeer-e-azam ne likha agar barsoun ke douran hamari party hindustani siyasat ka ek ahem sutoon ke tor par ubhri hai to iska sehra Advani jee jaisay leder ko jaata hai. wo ek Danishwer , ek siyasatdan aur sab se bawaqar leadroun mein se ek hain. hamaray bashindoun ko ba-ikhtiyar bananay ki simt mein Advani jee ki ghair mamooli khidmaat ko Hindustan hamesha yaad rakhega. unhoun ne kaha Advani jee ki saalgirah par mein inhen mubarakbaad deta hon aur unki lambi Umar aur sehat mand zindagi ke liye dua karta hon. Mr Advani aaj 92 baras ke hogaye. unki paidaiesh 8 November 1927 ko hui thi. –YTN STAFF