Jammu: Wazer-e-Azam Narendra Modi 28 March Baroze jumeraat Jammu ke muqam akhnoor mein BJP ki intikhabi rally ko mukhatab karenge. Modi is rally may guzishta 6 saal ke douran jammu kashmir mein shuru ya paye takmeel ko pounchanay walay taraqiyati projects ki tafseelaat bhi faraham karenge.
Is rally ka asal maqsad BJP umeedwaroun bilkhushoos Jugal Kishore Sharma aur Dr Jitendar Singh ke liye vote maangna hai kyunkay yahan BJP ke un umeedwaroun ko sakht muqablay ka saamna hai. Jugal Kishore Sharma parlimani halqa jammu jabkay Jitendar singh parlimani halqa Adham poor ke umeed waar hain .
Modi ki mujawaza rally ke mutaliq izhaar-e-khayaal karte hue BJP ke reyasti sadar ravinder raina ne kaha ke akhnoor ke dehaat Domi Nami mein Wazeer e Azam ke jalsay mein 2 laakh se ziyada log shirkat karenge aur is jalsay ke liye tamam tar intizamaa mukammal karliye gay hain. Wazeer e Azam banay ke baad yeh moodi ka 12th dora jammu ka hoga aur guzashta baras mah-e-June mein BJP aur PDP hukoomat ke ittehaad ke khtama ke baad yeh Wazeer e Azam ka dosra dora hoga .
Modi ke jalsay ke paish e nazar Domi akhnoor mein security ke misali intizamaa kiye gay hain. poooray zila jammu bilkhushoos nazdeeqi sarhadi ilaqon mein forces ki izafi nafri tainaat ki gayi hai jabkay jalsa gaah ko charoun atraaf se security hisaar mein liya gaya hai aur CCTV cameroun ke zariye 24 ghantay nigahdeshiyat ki jarahi hai .
BJP ko yaqeen hai ke jammu aur Adham poor parlimani halqay woh 2014 se bhi ziyada farq se kamyabi haasil kere gi. muqami saddar ne kaha ke hum jammu ki parlimani nishist par kam az kam 3 laakh jabkay Adham poor parlimani nishist par paanch laakh voton ke farq se kamyabi haasil karen ge .