Wazeer e Azam Narendra Modi aur Wazeer e Kharija Sushma Swaraj ney sabiq Wazeer e Azam Pakistan Nawaz Sharif ki Ahliya Begum Kulsoom Nawaz ke inteqaal par taaziyat ka izhaar kiya hai. Wazeer e Azam Narendra Modi ki taraf se Nawaz Sharif ke naam taziyati khat bheja gaya hai, jis mein unhon ne Sabiq Pakistani Wazeer e Azam ko mukhatib karkay likha hai ke ”mein aap aur sogwaar khandan ki isteqamat ke liye duago hon”. Unhon ne mazeed kaha ke’ Begum Kulsoom Nawaz ke intqaal ka sun kar gahera sadma pahoncha, mein khuda se daago hon ke woh aap aur aap ke ahal khanah ko is na qabil talaafi nuqsaan ko bardasht karne ka hausla dey aur Begum Sahibaa ki rooh ko sukoon ataa farmaiye. Narendra Modi ney mazeed kaha ke ‘Begum Kulsoom ke sath honay wali mulakaton ki Khushgawar yaden hamesha sath rahen gi. Samaji rabita ki Website twitter par pegham mein Bhartiye Wazeer e Kharija Sushma Sawaraj ney bhi Begum Kulsoom Nawaz ke intqaal par gehray dukh aur afsos ka izhaar kiya hai aur kaha ke woh Ghamzadah khandan se dili taaziyat karti hain. Un ki rooh ko sukoon miley.