New Delhi: Wazeer e Azam Narendra Modi aur wazeer e dakhla Amit Shah ne Pulwama dehshat gardana hamlay ki pehli barsi par shaheed jawanu ko kharaaj aqeedat pesh karte huve kaha ke Hindustan un ki shahadat ko kabhi nahi bhoolay ga. Modi ne jummay ke roz Twit kar ke kaha guzashta saal Pulwama khud kash hamlay mein shaheed bahadur jawanu ko kharaaj e aqeedat. Wo ghair mamooli shakhs they jinhoun ne hamaray mulk ki khidmaat aur tahaffuz ke liye apni zindagi ko waqf kar diya. Hindustan un ki shahadat ko kabhi nahi bhoolay ga.
Wazeh rahay ke guzashta saal 14 Feb ko Jaish Mohammad ke ek khud kash hamla aawar ne Jammu o Kashmir ke Pulwama zila mein Central Reserved Police Force ( CRPF ) ke ek qaafley ko nishana banatay huve dhamaka khaiz mawaad se bhari Car mai dhamaka kar ke waardaat ko anjaam diya tha. Is hamlay mein 40 se zayed CRPF jawan shaheed ho gaye they aur 10 se ziyada zakhmi huve they.
Alawa azeen markazi wazeer e dakhla Amit Shah ne pichlle saal Pulwama mein markazi Reserved Police Force ( CRPF ) ke jawanu par huve khudkush hamlay mein shaheed jawanu ko kharaaj aqeedat dete huve jummay ko kaha ke mulk un ki azeem qurbani ko hamesha yaad rakhay ga.
Amit Shah ne Twit karkay kaha Hindustan apne un bahadur fojioun aur gharwalu ka hamesha ahsaan mand rahay ga jinhoun ne mulk ki khud mukhtari aur salmiyat ke liye apni jaanun ki qurbani di thi.
Pichlle saal 14 Feb ko Jaish Mohammad ke ek khudkush hamla aawar ne Pulwama zila mein CRPF ke ek qaafley ko nishana banatay huve dhamaka khaiz mawaad se ladi Car se dhamakay ko anjaam diya tha. Is buzdelana hamlay mein 40 se ziyada CRPF jawan shaheed hogaye they aur 10 se ziyada zakhmi huve they. Is ke baad hindustani fazaiya ne Pakistan ke Khyber Pakhtunkhwa ke Balakot shehar mein dehshat gardoun ke thikaane par fazai hamlay kiye they aur mutadid Bomb giraye they. –YTN STAFF