New Dehli: Chhattisgarh ke Chief Minister Bhupesh Baghel ne wazeer e aazam Narendra Modi aur wazeer dakhla Amit Shah par ek baar phir tanqeed kiya hai. Unhoun ne Modi aur Amit Shah ka mawazna Germany ke tanashah Hitler se kiya hai. Unhoun ne kaha ke Hitler ne ek baar apni taqreer mein kaha tha ke aap mujhe jitni chahay gaaliyan den lekin Germany ko gaali mat degiye. Mota bhai chhota bhai bhi bilkul yahi baat keh rahay hain, Isi terhan ki zabaan bol rahay hain.
Is se qabal shehriat qanoon aur NRC ke talluq se apna radd amal zahir karte hue Bhupesh Baghel ne kaha tha ke Modi aur Shah ke darmain talkhiyan peda ho gayi hain aur is mein poora mulk tabah ho raha hai. Modi kehte hain ke mulk mein NRC nafiz nahi hoga lekin wazeer e dakhla Chronology batatay hue kehte hain ke NRC nafiz hoga. Lagta hai ke dono ke darmain dooria badh gayi hain jis mein aam loog pareshan ho rahay hain. Ye pata hi nahi chal raha hai ke kon sahih aur kon ghalat bol raha hai.
Bhupesh Baghel ne mazeed kaha tha ke aaj mulk mein mehengai hai, Bohraan hai, Be rozgari hai, Lekin is ki baat nahi ho rahi hai. Behas shehriat par ho rahi hai. Unhoun ne kaha ke jab aap se poocha jata hai ke kiya aap Hindustan ke shehri hain, Ye sab se badi be izzati hai. Ye pochtey hain ke aap ke walidain ki tareekh paidaiesh kiya hai? Kitney loog bata satke hain ke un ke walidain ki tareekh paidaiesh kiya hai. –YTN STAFF