Hyderabad : Hindustani cricket team ke home season ka bhalay hi tawaquaat ke mutabiq aaghaz nahi hua hai jaissa ke usay Junoobi Africa ke khilaaf kheli gayi teen twenty 20 muqabloun ki series mein kamyabi ki bajaye 1-1 hua lekin home season kayi teamon ke khilaaf twenty 20 aur ODI ke alawa Test muqablon par bhi mushtamil hai jahan cricket shaiqeen ko mezban team aur iske captain Virat kohli ke kayi ek records dekhnay ko mileinge.
Is ke liye star sports ne hindustani team ke sath mission 2020 ka aaghaz bhi kardiya hai jis ke tehat is ke mukhtalif channelon par hindustani team ke muqablon aur series ka raast mushahida kiya ja sakta hai.
yaad rahay BCCI ki janib se hindustani team ke home season 2019-20 ka elaan kiya gaya hai jis mein hindustani team Junoobi Africa ke khilaaf season ka aaghaz karne ke alawa Bangladesh, Zimbabwe, west indies aur Australia ki bhi maizbani karegi.
Junoobi Africa ke khilaaf freedom trophy mein twenty 20 series to mukammal hochuki hai ab 2 oct se 3 muqablon ki Test series shuru hogi jis ke baad November mein Bangladeshi team teen Twenty 20 aur do Test muqablon mein hindustani team shirkat karegi.
Bangladesh ke khilaaf 26 November ko Calcutta Test ke ekhtataam ke baad 6 dec ko west indies aur Hindustan ke darmiyan Mumbai mein pehla twenty 20 khela jayega jis ke baad 11 dec ko hyderabad teesray ODI ki maizbani kar raha hai.
Twenty 20 ke baad Hindustan aur west indies ke darmiyan teen ODI muqablon ki series hogi jis ke baad 5 January ko Hindustan aur Zimbabwe ke darmiyan pehla twenty 20 muqaabla khela jayega. hind aur Zimbabwe ki teams sirf teen twenty 20 muqablon ki series mein shirkat karengi jis ke baad autraliyai team Hindustan ki muhim hogi jo ke teen ODI khailaygi jis ke baad March 2020 may Junoobi africi team phir ek martaba Hindustan ka doura karegi aur dono ke darmiyan teen ODI muqablay khailay jayenge.
Home series ke douran Virat kohli ko jahan world cupp 2020 ke liye apni twenty 20 team tayyar karni hai wahein woh khud ODI aur twenty 20 ke alawa Test cricket mein kayi ek infiradi records uboor kar saktay hain. Virat kohli is douran steve smith se Test cricket mein apna khoya hua pehla maqam haasil karne ke liye koshan honge jabkay ODI mein inhen sabiq azeem batsman sachin tendulkar ke 49 ODI centuries ka record todnay ke liye 7 centuria darkaar hongi. neez teen centuries ke zareya woh Ricky pointing ke ba-hasiat captain 41 centuries ka record bhi toad satke hain.
Is ke alawa twenty 20 cricket mein kohli apni pehli century bhi score karne se daur hain aur umeed hai ke home season mein yeh record bhi mukammal hojayega. un tamam halaat ki munasbat se star sports ne mission 2020 ka nah sirf elaan kiya hai balkay Junoobi Africa ke khilaaf ibtidayi teen twenty 20 muqablon ki series ki bhi raast nashriyat mukammal ki hain. –YTN STAFF