Kolkata: Duniya ke sab se baday jamhoori mulk Hindustan mein barsar iqtedar Bhartiya Janata Party ( BJP ) ko muslim mukhalif jamaat hi kaha jata hai halaanke BJP mein kayi naam wo Nihaad muslim qaideen moujood hain jo bazahir khud ko aqliati tabqay ke numaindon ke tor par zahir karne ki koshish karte hain lekin bunyadi tor par islam se unki wabastagi par hamesha hi sawalia nishaan laga raha hai. bazahir muslim naam rakhnay ke sath markazi kabeena mein kayi aisay qaideen moujood hain jo khud ko musalman zahir karte hue musalmanoun ke numainday ke tor par khud ko BJP ke jhande taley paish hain .
Hindustan ke parlimani intikhab 2019 mein ibtidayi marahil ki raye dahi mukammal ho chuki hai aur BJP naay 2014 mein baday baday waday kiye they is ke puray na honay ke baad is martaba apni Iqtidaar ki kursi baqi rakhnay ke liye kayi ek hathkande ikhtiyar kiye hain jis mein aisay muslim siyasi qaideen ko bhi ticket diya gaya hai jis se yeh zahir kiya jaye ke BJP sirf hinduoun ki jamaat nahi balkay woh ek secular jamaat hai aur musalmanoun ko bhi woh apne khaimay mein khair maqdam karti hai, yahi wajah hai ke maghribi bangal mein do muslim BJP ke umeedwaron jin mein ek khatoon bhi shaamil hain, ko apni kamyabi ki umeed hai halaanke yeh do umeedwaar sabiq mein congress, Trinamool congress, SPIM aur samaaj waadi party mein bhi shaamil rahi hain .
Maghribi bangal ke intikhabaat ke liye BJP mein do muslim umeed waar humayun Khair aur Mehfooza khatoon shaamil hain jo ke na sirf BJP ki mukhalif muslim jamaat ki shanakht ko khatam karne ka daawa kar rahay hain balkay inhen umeed hai ke awam inhen apne halqay se kamyaab banayengi. Humayun Kabeer Musheerabad lok sabha nishist se BJP ki umeed waar hain jabkay Mehfooza khatoon Jangipur se intikhabaat lad rahi hain. Humayun Trinamool congress ke sabiq wazeer bhi hain jabkay Mehfooza khatoon SPIM ke rukan-e-assembly bhi reh chuki hain .
Jangipur aur Musheerabad mein parlimani intikhabaat ke teesray marhalay mein raye dahi mukammal ho chuki hai aur BJP ke ticket per mazkoorah nishistoun se intikhabi maidan mein mojood Humayun war Mehfooza khatoon ko apni kamyabi ki umeed hai kyunkay unhon nay intikhabi muhim ke douran Talaq-e-salasa ko ahem mauzo ke tor par istemaal karne ki bajaye muslim khawateen ko ba-ikhtyar bananay, taleem ke mawaqay faraham karne ke alawa unpar honay walay gharelo tashadud jaisay masail ko intikhabi muhim ka hissa banaya hai .
BJP naay halaanke haliya dinon mein Talaq-e-salasa par Hindustan bhar mein ek hungama barpaa kar diya tha aur is nay poori koshish ki thi ke parliment mein qanoon ko Manzoor kerwatay hue Talaq-e-salasa ko ek aisay qanoon ke tehat laya jaye jis par amal karte hue muslim khandano aur khaas kar mardon ke khilaaf sakht se sakht karwai ki jaye jo ke ek hi nishist mein apni zowja ko teen Talaq dete hain lekin BJP ki yeh sab sazshi koshish nakaam rahin, lehaza Musheerbad aur Jangipur se BJP ki numaindagi karne walay yeh do umeedwaron ko pehlay hi andaza ho chuka tha ke agar woh Talaq-e-salasa ka mauzo uthatay to inhen na sirf muslim tabqay ki janib se qubool nahi kiya jata balkay aqliati tabqay ka inhen ek bhi vote nahi milta, lehaza unhon nay intikhabi muhim ke douran muslim khawateen ko bunyadi masail ka jhansa dainay ki koshish ki hai. BJP jis nay 2014 ke intikhabaat mein sab ka sath sab ka vikas ke naam par Hindustan ki bholi bhaali awam ko pehlay hi dhoka day chuki hai kyunkay guzashta parlimani intikhabaat mein BJP naay jo hathkande ikhtiyar kiye they aur is mein mazhab ke naam par tafreeq phelanay ki koi koshish nahi ki gayi thi halaanke Iqtidaar ki kursi haasil karne ke Dar parda zafrani jamaaton ke yahi maqasid they lekin unhon nay Secular aur taraqqi ka jhoota naqaab cheharon par daal kar Hindustani awam ko dhoka diya hai aur isi ki ek aur koshish maghribi bangal ki un do lok sabha nishistoun par muslim umeedwaron ki janib se ki ja rahi hai aur yahan Talaq-e-salasa ke baraks muslim khawateen ko ba-ikhtiyar bananay inhen taleem Yafta bananay ke alawa gharelo tashadud se chuth-kara dilanay ke sabz baagh dikhaay jarahay hain .
Mehfooza khatoon jinhon nay 2017 mein BJP mein shamoliat ikhtiyar ki hai unka maanna hai ke woh apne lok sabha halqa se kamyabi haasil karte hue sab se pehlay BJP ki mukhalif muslim shanakht ko khatam karenge aur inhen poori umeed hai ke jis tarha is halqay ki awam naay BJP mein unki shamoliat ka khair maqdam kiya hai isi tarha woh apni himayat dete hue inhen parliment mein bhi pohnchayinge. Mehfooza khatoon nay oppostion jamaaton khaas kar congress aur Trinamool congress ko shadeed tanqeed ka nishana banaya hai aur kaha hai ke guzishta 70 barson mein un jamaaton naay khud ko Secular jamaaton aur musalmanoun ki hamdard jamaaton ke tor par khud ko paish kiya hai lekin unhoun nay musalmanoun ke liye kuch nahi kiya balkay musalmanoun ko vote bank ki tarha istemaal kiya hai, jabkay BJP par ilzaam aed kiya jata hai ke woh mukhalif muslim jamaat hai halaanke BJP mein is waqt kayi muslim qaideen mukhtalif log sabha halqon se apni davidari paish kar rahay hain .
maghribi bangal ke intikhabaat mein muslim raye dahindoun ka Badshah-gar mouquf hota hai kyunkay bangal ki jumla abadi mein musalmanoun ka tanasub 30 feesad hai jabkay Jangipur lok sabha nishist mein jumla raye dahindgaan mein 58 feesad muslim voters hain. musheerabad lok sabha nishist par 50% se zayed muslim voters moujood hain. BJP jis nay maghribi bangal mein apne 42 umeedwaroun ko intikhabi maidan mein utaara hai un mein Humayun Kabeer aur Mehfooza Khatoon wahid muslim umeed waar hain lekin BJP ko umeed hai ke jahan 12 se 15 lok sabha nishistoun par aqliati tabqay se talluq rakhnay walay voters kaledi rule ada karenge aur yeh vote BJP ke haq mein aasatke hain. Behr-e-kaif BJP jo secular naqaab odh kar maghribi bangal mein aqliati tabqo aur khaas kar muslim raye dahindgaan ko lubhaney ki koshish kar rahi hai woh is mein kamyaab nahi ho payegi kyunkay qaumi satah par is nay guzashta intikhabaat mein jo waday kiye they woh waday sirf sabz baagh hi saabit hue hain to phir kis tarha doodh ka jala Chanch baghair phoonkay piyega ? – YTN STAFF