Riyadh: Corona ki waba ney Saudi Arab sameit duniya bhar mein samaji, Intizami, Muashi aur tijarti tor tareeqay badal kar rakh diye hain. Mashriqi maashroun mein dhoom dhaam ke sath shadi ka rivaaj hai aur Coronavirus ki waba ney is rivayet ko bhi badal diya hai. Mecca ke nojawan Khizar Bin Mustafa ki shadi ki taqreeb Zoom Application ke zariye munaqqid ki gayi hai jis ka antezam Mecca ki falahi anjuman Hadia ney kiya tha.
Taqreeb mein dulha dulhan ke rishte daar, Dost ahbaab aur anjuman ki majlis Amila ke arkaan ne shirkat ki. Shadi ka ek aur dilchasp pehlu ye hai ke dulha aur dulhan ki taraf se shadi ke mauqa par ada ki jaane wali deegar rasmen bhi online hi huien. Shadi ke geet gaaye gaye aur riwayati raqs kiya gaya. Dulha ko is ke rishta daaroun aur dost ahbaab ne Zoom ke tavassut hi se shadi ki mubarakbadain den.
Khazer Hadia anjuman ke mumtaz karkunaan mein se ek hain aur maazi mein khud kayi nowjawanoun ki shadion mein badh chadh kar hissa le chuke hain. Mecca Mukarmah ke aisay safaid posh gharane jo intahi zaroorat ke bawajood kisi ke agay haath nahi pheilatay they un ke betoun aur baityoun ki shadian anjuman ke saibaan taley karwai jati hain.
Mecca Mukarmah ke is terhan ke jodoun ney bhi Khizar Bin mustafa ki online shadi taqreeb mein shirkat ki. Mehmanoun ne is mauqa par coronavirus se bachao ke baray mein apne khobsorat tajarbaat dilchasp andaaz mein pesh kiye. Is terhan ye shadi mukhtalif hawaloun se melasi ban gayi.