Pakistan ke nau muntakhab Wazeer e Kharaja Shah Mahmood Qureshi ney id-daa kya ke Bharat ke Wazeer e Azam Narendra Modi ney kal khat bheja hai jis mein Imran Khan ko Wazeer e Azam ban’ney ki mubarakbad di hai aur mazakraat ki dawat bhi di hai. Wazeer e Kharja Shah Mahmood Qureshi apne ohda ka halaf lainey ke baad Daftar e Kharja poanch gaye. Wazeer e kharja ka mazeed kehna hai ke inhen Bharat ke sath darina masail ka idraak hai, Bharat ki Wazeer e Kharaja ke liye mera pegham hai ke ‘Kashmir’ Pakistan aur Bharat mein tanazeaat ki bunyadi wajah hai, dono Mumalik hamsaye aur atomici quvvat hain, Bharat se tasalsul ke sath dialogue ki zaroorat hai. Unhon ney mazeed kaha ke ayindah mah aqwam e mutahidda ka ijlaas honey wala hai, beroni Mumalik Pakistan ke safeer haakim nahi hain, Mulk ko aalsmi tanhai se nikaalte ke liye iqdamaat karenge, Pakistan ka mafaad sab se muqaddam hai. Shah Mahmood Qureshi ney kaha ke Pakistan aur America mein etemaad ka fuqdaan hai jisay door karna chaahunga, America ke sath maazi mein kaam karne ka bhi mauqa mila hai, tarjeehat samney rakh kar Amrici Wazeer e Kharja se baat karoonga. Wazeer e Kharsja Shah Mahmood Qureshi ka kehna hai ke C-Pack bahut ahem mansoobah aur game changer hai, Chinese safir ko dawat di hai ke woh C-Pack par paishraft se aagah karen. Wazeer e Kharaja ka kehna hai ke Afghanistan aur Pakistan ko aik dosray ki zaroorat hai, Afghanistan Wazeer e Kharaja se rabita karkay dora kabul ki khwahish rakhtay hain.