Hyderabad: Mayor greater hyderabad municipal corporation ( GHMC ) B.Rammohan corona se misbet paye gaye.
Rammohan ne kaha kay unhon ne apne arkaan khandan ke sath 25 July ko corona ka Rapid test karwaya tha jis mein woh misbet paye gaye jabkay unke arkaan khandan manfi paye gaye.
Unhon ne kaha kay report aanay ke baad woh alag thalag hogaye. unhon ne kaha ke woh is talluq se fikar-mand nahi hain. woh alag thalag miyad hone ke baad dobarah apni jaanch karwaenge aur manfi anay ke baad Plasma ka atiyah denge.
Isi tarhan deegar afraad ke sath milkar telangana bhavan mein plasma ke atiyah ka khusoosi camp bhi qaim kiya jayega.
Rammohan ne kaha kay woh ghar hi se sorat-e-haal par nazar rakhe hue hain aur ohdedaron ke sath jaiza ijlaas bhi munaqqid kar rahay hain.
Shehar ke awam ko unhon ne mashwara diya ke woh wabai amraaz se bachney ke liye saaf safai ka khaas khayaal rakhen, macharoun ki afzaish ko roknay ke iqdamaat karen.