Hyderabad. Chennur halqa e Assembly se maujooda rukn Nallela Odelu ko ticket se mahroom na karne ka Chief Minister o sadar Telangana Rashtriya Samiti Mr. K Chandrashekar Rao se mutaleba karte huwe un ke aik kattar haami ney Rukn e Parliament Peddapally Mr. Balka Suman ki maujoodgi mein khud suzi ki koshish ki. Mr. Suman zila Mancherial mein Jaipur mandal ke Indaram mein taqreeb sang e buniyaad mein shirkat ke liye aaye huwe thay. Mr. Chandrashekhar Rao ney Assembly ki tahleel ke baad apni Party ke 105 umeedwaron ki fehrist jari ki thi jin mein taqreeban tamam maujooda Arkaan e Assembly ko hi ticket diya gaya tha taham jin maujooda MLAs ko ticket se mahroom kiya gaya un mein Nallela Odelu bhi shaamil hain. Taqreeb mein Rukn e Parliament ki shirkat ka pata chalne par Gattia wahan pahoncha aur kerosene chidak kar khud ko aag lagali. Is naujawan ko lagi aag bujhanay ki koshish karne walay teen logon ko bhi aag pakad li jis ke baayis yeh charon shadeed taur par jhulas gaye. Wahan maujood logon ney aag bujhai aur unhen Hospital mein shareek karwaya. Nallela Odelu mutawatir teen meqaat se kamiyaab hotay rahay hain aur woh aayindah intekhabaat mein TRS Party ke ticket se mahroom honay walon mein shaamil hain.