Hyderabad : Shehar ke Azampura ilaqay mein waqay ”Masjid-e-Ali“ mein kuch na-maloom afraad ki janib se masjid mein chori karne ki koshish ka waqeya samnay aaya hai, jis mein masjid ke sound system aur deegar qeemti cheezoun ko lootne ki koshish ki gayi hai aur masjid ki cheezoun ko bahar pheink diya gaya tha. mazkoorah waqeya ki ittila milnay ke baad MBT ke rehnuma Amjed ullah kaan Khalid ne Masjid-e-Ali pohanch kar muaina kiya aur masjid committee ke ohdedaroun se mulaqaat ki.
Is waqeya par Amjed ullah Khan ne afsos ka izhaar kiya, aur kaha ke yeh mehez ek chori ki koshish thi ya koyi firqa waranah tashadud bhadkanay ki koi Harkat thi. chadarghat police ko uska pata lagana chahiye. Amjed ullah ne kaha ke yeh afsoosnaak hai ke yeh waqeya hukoomat Telangana ke wazeer-e-dakhla Mohammad Mehmood Ali ki rehaish gah ke qareeb runuma hua. is se yeh zahir hota hai ke Hyderabad police kitni chokas hai.
Unhon ne kaha ke is Masjid ko doosri baar is tarhan ki harkat ka nishana banaya gaya hai. pichli baar bhi isi masjid mein chori ke bawajood, chadarghat police mazkorah ilaqay mein CCTV camera laganay ya raat ko khusoosi tor par nigrani rakhnay mein nakaam rahi hai.
MBT rehnuma ki tavajja dilanay ke baad SHO chadarghat ne ek case darj kar liya aur yaqeen dehani karai ke khaati ko bohat jald giraftar kar liya jayega. aur iski giraftari ke liye khusoosi teams tashkeel di jayengi. –YTN STAFF