Mumbai : Hindi filmoun ko apne sunehre naghmoun se sajakar inhen amar bana deney walay bollywood film industry ke Maroof mowsiqar Khayyam Mumbai ke hospital mein intqaal kargay. unki Umar 92 saal thi. inhen phephdoun ke infection ke baais 9 August ko Mumbai ke hospital mein daakhil kiya gaya tha, jahan guzishta raat un ki tabiyat bidgadh gayi. unhon ney guzishta raat taqreeban saadhay 9 bajay aakhri saans li. doctoron ke mutabiq Cardiac arrest ki wajah se unki mout waqay hogayi. Peer ki shaam se hi unki haalat naazuk thi aur doctoron ki ek team unki nigrani kar rahi thi.
Mowsiqaar Khayyam ka poora naam Mohammad zahoor Khayyam hashmi hai, lekin filmi duniya mein woh Khayyam ke naam se mashhoor the. woh 18 feb 1937 ko Punjab ke zila jalandhar ki tehseel nawan shehar mein paeda hue they. inhen 3 baar film fair award diya gaya. unhon ney 1953 mein film foot path se apni filmi zindagi ka aaghaz kiya tha. unki mashhoor filmoun mein, phir subah hogi, Lala rukh, kabhi kabhi, noori, thodi si bewafai, dil nadan, bazaar, Razia Sultan waghera shaamil hain.
Wazeer-e-aazam Narendra Modi nay Maroof mowsiqaar Khayyam ke intqaal par taaziyat ka izhaar karte hue kaha ke unke na qabil faramosh karnamon ke liye film aur art ki duniya hamesha unki maqrooz rahegi. Modi nay Tweet kiya ”Mashoor mowsiqaar Khayyam saheb ki mout afsoosnaak hai. unhon ney apni yadgar mowseeqi se mutadid naghmon ko lafani bana diya. film aur art ki duniya un ke na qabil faramosh karnamon ke liye humesha unki maqrooz rahaygi. gham ki is ghadi mein un ke kumba ke sath taaziyat karta hon“ .
Bollywood ke Maroof mowsiqaar Khayyam ke intqaal se filmi duniya mein afsos ki lehar daudh gayi hai. aur bollywood ke adakaron ney Padama bhushan Yafta mowsiqaar ke intqaal par izhaar-e-taaziyat kiya hai.
Sath hi Maroof gulukarah Lata mangeshkar ney bhi Twitter par Khayyam ki mout par ranj wo gham ka izhaar kiya aur inhen ek azeem mowsiqaar aur ek meharban shakhs bhi qarar diya. Lata mangeshkar ney kaha ”Khayyam saheb, ek azeem mowsiqaar aur naram dil, insaan hamaray darmiyan nahi hain. mujhe yeh khabar sun kar bohat dukh hua, mein alfaaz mein bayan nahi kar sakti. Khayyam saheb ki chalay jaaney se mowseeqi ka ek daur khatam hua. mein inhen dil se kharaaj paish karti hon.
Javed Akhtar ney Tweet kiya ”Azeem mowsiqaar Khayyam saheb ka intqaal ho gaya. unhon ne humesha bohat saaray behtareen ganay diye hain, lekin inhen amar bananay ke liye ek hi naghma kaafi hai ”oh subah kabhi to aayegi“. –YTN STAFF