Mumbai : Markazi wazeer baraye railway Piyush Goyal ke ghar mein chori hui hai aur is silsila mein noukar ko giraftar kiya gaya hai jis ka naam Vishnu kumar verma bataya ja raha hai.
Yeh maamla chori ka hai ya kuch aur hai iska pata lagaya jana baqi hai lekin yeh waqea apne aap mein kaafi sangeen hai kyunkay yeh chori markazi hukoomat ke ahem wazeer ke ghar par hui hai.
Markazi wazeer baraye railway Piyush Goyal ke Mumbai walay ghar mein chori hui hai aur mulzim ko Dehli se girftar kiya gaya hai. Police ke mutabiq ghar par kaam karne walay ek nokar ne 15 ya 16 sepember ko chori ki thi.
Mumbai police ne Dehli se ek nokar girftar kiya hai aur girftar kiye gaye mulzim ka naam vishnu kumar verma hai. mulzim ke paas se kuch paisay aur hard disk bar aamad ki gayi hai. Police ko shak hai ke ke mulzim ne apne phone ke zareya kuch ahem maloomat kisi ko bheje hain jiski tehqiqat ki jarahi hain. jaissa ke Police keh rahi hai ke agar aisa hai to yeh bohat sangeen maamla hai aur yeh pata lagaya jana zurori hai ke agar mulzim ne kisi ko koi ahem maloomat rawana ki hain to nah sirf bhejhay jane wala shakhs ka giraftar kiya jana zurori hai balkay yeh pata lagaya jana zurori hai ke maloomat kitni ahem aur sangeen noiyat ki hai.
Kaha ja raha hai ke mulzim guzashta teen saal se markazi wazeer ke ghar par kam kar raha tha. abhi mulzim ka phone muaina ke liye cyber cell bhej diya gaya hai aur police mitaye gaye mail ko haasil karne ki koshish kar rahi hai. is ke alawa mulzim ke sathiyon ki bhi talaash jari hai. –YTN STAFF