Hyderabad : Mulk ke tamam badey hawai addoun ke liye markaz ki taraf se jari kardah security intibah ke paish-e-nazar hukkam ne yahan Rajiv gandhi bain-ul-aqwami hawai addey ( RGI ) mein security intizamaa mein izafah kar diya hai. hawai adday par kaam karne wali GMR Hyderabad international Airport limited ( GHIAL) ne musafiroun ko hawai addey tak jaldi pohanchney ke liye ek advisory jari ki hai.
Isne 10 se 20 August tak zaireen ke hawai adday mein dakhlay par bhi pabandi ka elaan kiya hai. zaraye ne bataya hai ke yeh pabandiyan yom-e-azaadi se qabal security intizamaa ke tor par aaed ki gayi hain. taham article 370 ko khatam karne ke markaz ke iqdaam ke baad jammu wo Kashmir ki sorat-e-haal ke paish-e-nazar izafi hifazati iqdamaat kiye ja rahen hain.
Zaraye ne bataya ke central industrial security force ( CISF ), jo hawai adday ki hifazat ke zimmedaar hai, ne samaan ki scanning aur musafiron ko roknay sameit hifazati iqdamaat sakht kar diye hain.
Bureau of Civil aviation security ( BACS ) ke jari kardah alert ke mutabiq, CISF aur police dono ne gasht ko teiz kar diya hai. police ne gadiyon ki checking ke liye izafi chowkiyan qaim kar di hain.
Airlines musafiron ko apni parwaazon ki taye shuda rawaangi se qabal Dhai ghantay se teen ghantay pehlay hawai adday par pohanchney ka bhi mashwara day rahi hai. –YTN STAFF