Ayodhya : Ayodhya mein Ram mandir ki tameer ke liye Trust qaim karne ke Supreme court ke hukum ke baad siyasi bayan baazi tez hogayi hai, Vishwa Hindu parishad ne kaha hai ke wazeer-e-dakhla Amit Shah aur Uttar Pradesh ke wazeer-e-aala Yogi Adityanath ko is Trust mein shaamil kiya jana chahiye. VHP ke tarjuman sharad sharma ne ek baar phir umeed zahir ki ke, Trust Ram janam bhoomi nyas ke tayyar kardah design ke mutabiq Ram mandir taamer karega.
Ram janam bhoomi nyas Trust 1990 se ayodhya ke karsevaakpuram mein funkaron aur karigroun ka work shop chal raha hai, jis mein funkaron ne bohat saaray pathar ke sutoon banaye hain. jin par naqsh wo nigari ka kaam kiya gaya hai. taakay jab bhi mandir banai jaye usay istemaal kiya jaye.
Workshop ke incharge 79 sala Anu Bhai ke mutabiq, Ram janam bhoomi nyas ke mansoobay ke mutabiq, ye mandir 268 foot lamba, 140 foot chaudha aur 128 foot ooncha hoga. is mein kal 212 sutoon honge. sharmaa ne umeed zahir ki ke naye Trust mein is Trust ka numainda bhi shaamil hoga.
Unhon ne kaha ”hamein lagta hai ke wazeer-e-dakhla Amit Shah aur Uttar Pradesh ke wazeer-e-aala Yogi Adityanath ko bhi is Trust mein shaamil kiya jana chahiye. aur somnath Trust ke khutoot par Ram mandir Trust tashkeel diya jana chahiye “. –YTN STAFF