Kolkata : Lok sabha intikhabaat ke hungamoun ke do mah baad, maghribi bangal ki wazeer-e-aala Mamata Banerjee ney peer ko yahan ek badha ”awami rabita muhim“ ka elan kiya. jis mein party ke ek hazaar leadroun ko aglay 100 dinoun ke douran, 10,000 se ziyada gaoun ka doura karne ke liye kaha gaya hai.
Unhoun ney isko Trinamool Congress ( TMC ) ki ”jaded kadi“ qarar dete hue kaha ke is muhim ke douran qaideen aur muntakhib numainday ”zamini satah per mazboot raabtey ustuwar karne aur logon ki shikayaat ko suneney “ ke liye koshan rahenge.
TMC bade paemanay par raabtey ke liye ek nai muhim shuru kar rahi hai. logoun se barah-e-raast rawabit ustuwar karne ke liye, hum ek phone number ( 9137091370 ) mutarif kar war hain, jis par log hamein phone kar sakte hain, aur hamein apne masail ke baray mein bata sakte hain. Mamata Banerjee ney party ke arkaan-e-assembly ke ek ijlaas mein yeh baat kahi.
Mazkoorah muhim ke zareya, aglay 100 din mein 1,000 se ziyada TMC qaideen aur muntakhab numainday 10,000 se ziyada dehaat aur qasbon ka dora karenge. aur awaami satah par raabtey karenge. woh unhi gaon mein raat ko qiyam karenge.
TMC Supremo ney ek Website www.dididkebolo.com bhi launch kiya, jiske zareya log apni pareshaniyon ko baant sakte hain. is muhim ka maqsad ek mazboot awaami buniyad banana aur logon ko unke izhaar-e-khayaal ke liye platform muhaiyya karna hai.
Mamta ney kaha ke awaami satah ke programme mein hissa lainay walay party qaideen, sirf apne intikhabi halqoun ke andar hi kaam karenge.
TMC ney aglay 20 mah ke douran 1.60 crore afraad tak rasai haasil karne ka hadaf banaya hai. yeh puche jaane par ke kiya barsoun ke douran zameeni satah par TMC ki girift dheeli hui hai, unhon ney kaha ke party abhi bhi ”Grass route level party “ hai aur unhon ney mazeed kaha, un iqdamaat ka maqsad awam ke sath taluqaat ko mazeed mustehkam karna hai.
Is muhim ka mazaq udatay hue BJP ney kaha ke yeh siyasi hikmat-e-amli Prashant Kishor’s ka idea tha, jo TMC ki tajdeed ke liye tayyar kiya gaya hai. yeh Kishor’s ka ek khayaal hai. lekin log didi ko is baray mein shikayat karne ke liye phone karenge, ke katoti ka paisa kis ney liya hai, aur kab? iske baad woh is se unke paise wapas karne ka yaqeen delainge. markazi wazeer Babul Supriyo ney yeh baat kahi. yeh bayan karte hue ke TMC aur banerjee apni saakh kho chuke hain babul supriyo ney kaha ”log is hukoomat se chutkara chahtay hain. –YTN STAFF