Hyderabad. Kul Hindd Majlis Ittehad ul Muslimeen ney apne tamam Arkaan e Assembly ko dobarah party ticket dete hue tajassus ko khatam kardiya. Iss martaba bhi shaher ke 7 Assembly halqon se jis ki numaindagi Majlis Ittehad ul Muslimeen karti hai maujooda Arkaan e Assembly ko hi ticket diya gaya hai aur sirf itni tabdeeli ki gayi hai ke janab mumtaz Ahmed Khan ko jo halqa Assembly Yakutpura ki numaindagi karte arhay they unhen Charminar halqa Assembly se umeedwaar naamzad kiya gaya hai aur Charminar halqa Assembly ki numaindagi karne walay janab Syed Ahmed Pasha Quadri ko Yakutpura se umeedwaar banaya gaya hai. Assembly ki tahleel ke baad se baaz halqon mein yeh chaymegoyaan ho rahi theen ke is martaba kam az kam do maujooda Arkaan e Assembly ko drop karte hue do naye umeedwaron ko maidan mein utaara jaye ga. Yahi wajah thi ke Majlis ke ticket ke husool ke liye kayi naujawan qaayideen intikhabaat ke liye zehni taurr par tayar ho gai thae. Maujooda Arkaan e Assembly ko hi dobarah ticket dyie janay ke bawajood ta haal aisa koi ishara nahi milta ke ticket se mahroom qaayideen baghaawat par amaada hain. Agarchay ticket ke khwaahan qaayideen kuch mayoos hue hain magar unhon ney party qiyadat ke faislay ko qubool karliya hai. Saddar All India Majlis Ittehad ul Muslimeen Barrister Asaduddin Owaisi ki jari kardah pehli fehrist ke mutabiq qaayed Muqannana Majlis janab Akbaruddin Owaisi (Chandrayangutta ), janab Mumtaz Ahmed Khan (Charminar), janab Ahmed Pasha Quadri (Yakutpura), janab Mohammad Muazzam Khan (Bhadurpura), janab Ahmed bin Abdullah Balala (Malakpet ), janab Jaffer Hussain Meraj (Nampally) aur Janab Kausar Mohiuddin (Karvan) umeedwaar hon ge. Bataya jata hai ke party aik aur fehrist jari kere gi jis mein shaher aur azlaa ke chand halqay shaamil hon ge, taham doosri fehrist bhi bamushkil 3 taa 5 umeedwaron par mushtamil hogi.