Mumbai : Haal hi mein 21 october ko Maharashtra mein assembly intikhabaat munaqqid hue, jahan deegar partiyon ke alawa AIMIM ne bhi intikhabaat mein hissa liya aur apne umeed waar khadey kiye. is se qabal Maharashtra assembly intikhabaat mein Maharashtra ke 2 halqon, Byculla aur aurangabad ( central ) se AIMIM ne apne umeed waar khadey kiye they jin mein halqa assembly Bycaulla se ”Waris pathan “ aur halqa assembly aurangabad se imtiaz jaleel ne shandaar kamyabi haasil ki thi.
Ab ki baar bhi deegar halqoun ke alawa un do assembly nishistoun par logon ki nazrain theen. imtiaz jaleel ke rukan-e-parliment muntakhib honay ke baad Aurangabad ( central) assembly nishist se naseer uddinTaqi uddin Siddiqui ko MIM ka umeed waar banaya gaya tha, magar is nishist per shiv sena ke umeedwar Jaiswal pradip shivnarayan ne kamyabi haasil ki hai, inhen 82217 vote ( 42.27 % feesad ) miley. jabkay AIMIM umeed waar naseer uddin Taqi uddin Siddiqui 68325 vote ( 35.12 % feesad ) haasil karte hue dosray number par rahay.
Jabkay Bycula nishist jo Maharashtra mein AIMIM ki ahem nishist maani jati hai. is par Shiv sena ki umeed waar yamini yashwant jadhav ne kamyabi haasil ki hai. halqa assembly Byculla mein shiv sena , congress aur AIMIM mein kada muqaabla dekha gaya. magar AIMIM ki is nishist par is baar shiv sena ki umeedwar yamini yashwant jadhav ne kamyabi haasil ki. Yamini yashwant jadhav ko 51180 ( 41.03 % feesad ) vote miley, jabkay AIMIM umeed waar waris pathan 31157 vote lekar 24. 98 % feesad ke sath dosray number par rahay. congress teesray aur AIMIM se naraaz bollywood adakar Ajaz Khan 2174 vote haasil karte hue 1.74 % feesad ke sath 6th number par rahay.
Byculla Mumbai city zila ke tehat Maharashtra ke Mumbai . Thane, ilaqa ka ek assembly halqa hai, aur yeh nishist general category ke liye makhsoos hai. 2014 mein munaqqid hue Maharashtra assembly intikhabaat mein, mazkoorah Byculla nishist se waris Yousuf pathan ne kamyabi haasil ki thi. waris pathan pesha se ek wakeel hain, jinhon ne 1993 ke bomb dhmakon ke mulzim aur hit and run case mein adakar Salman Khan ki numaindagi ki hai. 29 November 1968 ko Mumbai ke Bandra mein paeda hue waris pathan, august 1991 mein qanooni peyshay mein shaamil hue. iske baad unhon ne AIMIM ke ticket par Byculla se intikhab lada tha aur kamyaab hue they. magar is baar inhen shikast ka mun dekhna padha. –YTN STAFF