Madina Munawwara: Saudi Arab mein Madina Munawwara Muncipality aur baldeati Consults ne ek haftay ke douran Restaurants, Tijarti marakaz aur khanay peenay ki ashya farokht karne walay idaron par 2071 chaapay maaray hain. Ye karwai sarfeen ko sahet bakhash ghizai ashya ki farahmi yakeeni bananay ke liye ki gayi hai.
Website ke mutabiq chhapa muhim ke nateejay mein 63 tijarti idaray mohar band kardiye gaye jabkay 826 idaron ko intibah naame jari kiye gaye hain. Madina Muncipality ne kaha hai ke 1758 Kilogram ghizai ashya zabt karkay talaf karai gayi hain.
Alawa azeen Restaurants aur tijarti marakaz se khanay peenay ki ashya ke 396 namoonay le kar Muncipality ki Laboratories mein muanay ke liye bhaij diye gaye. Muncipality ne kaha hai ke maholiyati sahet ki teams ne 432 field doray kiye. Teams ke ohdedaron ne 11966 gharelo kachra saaf karwaya aur Madina Munawwara ke mukhtalif mehloon mein pada huwa 42187 mak-ab meter malba hatwa hai.
Madina Munawwara Muncipality nay logoun se kaha hai ke wo shehar ko saaf suthra rakhnay, Muqami shehrion aur muqeem ghair mulkion ko khanay peenay ki na qabil istemaal ashya ke muzir asraat se bachanay ki muhim mein taawun karen. Kahin bhi koi bhi ghalat sargarmi ka mushahida karen to pehli fursat mein 940 par shikayat center ya baldi App 940 par rabita karkay ittila den.