Lucknow: Francesi sadar Emmanuel Macron ke Islam ke khilaaf mutanazia tabsaray ke khilaaf Hindustan ke mukhtalif hisson mein ehtijaj huwa hai jis mein Aligarh bhi shaamil hai aur guzashta rooz yaha hue ehtajaji muzahirey ke baad riyasat bhar mein Alert jari kardiya gaya hai. Is baat ka tazkara ahem hai ke Aligarh Muslim University ke talba ne kal ek juloos nikala tha jis mein Francesi sadar ke khilaaf naaray baazi ki thi. Muzahireen talba ka muaqqaf tha ke France se daraamad shuda koi bhi samaan ab nahi khareeda jaye ga aur France ki masnoaat ka mukammal boycott kiya jaye ga.
France mein chand din pehlay kamray jamaat mein talba ko hazrat Mohammad ke khakay dikhaane walay ek Teacher ko Muslim taalib ilm ne sarqalam kardiya tha. Jis ke baad Francesi sadar ne Islami shiddat pasandi par mutanazia bayan dete hue tamam musalmanoon ko nishana banaya tha. Macron ke bayan ke baad France mein musalmanoon ke gharon aur Masajid ke khilaaf karwai ki gayi, Jis ki wajah se Hindustan samait mukhtalif mumalik ke musalmanoon mein France ke khilaaf narazgi badhti jarahi hai aur ehtajaji muzahirey ho rahay hain.
Uttar Pradesh police head quarter ne tamam azlaa ke senior police ohdedaron ko hidaayat di hai ke woh un azlaa mein mukammal nigrani karen jahan aisay muzahirey ka imkaan hai aur kisi bhi haalat mein ehtijaj nahi honay diya jaye. Police director general Hatish Chandra Vasthi ke bamujab Police ohdedaron ko hidaayat di gayi hai ke woh un azlaa mein khusoosi nigrani karen jahan 3 din ke baad Assembly ke zimni intikhabaat munaqqid shidni hain. Alawa azeen Hindustan mein Islami taleem ke sab se baday idaray Darul Uloom Deoband ne bhi Islam ke khilaaf Francesi sadar ke bayan ki mukhalifat ki hai.