Hyderabad : Mere maa ke liye 50 saal ki Umar tak ka dulha talaash hai aur khush shakal nazar aanay walay, gosht se parhaiz karne aur sharaab noshi se door rehne walay mard ko tarjeeh dengi. jee haan yeh ishtihar un dinon twitter par kaafi maqboliat haasil kar raha jiski charon goshoun se tareef honay ke liye alawa Narendra Modi, Amit Shah, Salman Khan aur Aniel Kapoor ke naamon ki tajweez bhi ishtihar shaya karne wali ladki ko di jarahi hai.
Aam tor par walidain apne bachon ki shadi ke liye fikarmand rehtay hain aur woh unke rishto ke liye jahan ishtiharaat shaya karwatay hain, wahein woh marriage bureau aur rishte-daaroun ki khidmaat bhi haasil karte hain. taham hindustan ki ek nojawan ladki ki janib se apne liye dulha talaash karne ke bajaye apni walida ke liye hamsafar talaash karne par is ki tareefen ki ja rahi hain.
Jee haan, hindustan mein ek noujawan ladki ne twitter par apni walida ke liye udhair Umar dulha ki zaroorat ka ishtihar day kar sab ko haeran kardiya. India today ke Mutabiq qanoon ki Taliba Aastha Varma ne twitter par apni walida ke liye 50 sala dulha ki zaroorat ka ishtihar day diya. Astha verma ne apni mukhtasir tweet mein walida ke sath apni tasweer share karte hue unke honay walay dulha ke liye shartein bhi batayen.
Noujawan ladki ne tweet mein bataya ke woh apni walida ke liye 50 saal ki Umar tak ka dulha talaash kar rahi hain. sath hi unhon ne wazeh kiya ke woh khush shakal nazar anay walay, gosht se parhaiz karne aur sharaab noshi se daur rehne walay mard ko tarjeeh dengi.
Nojawan ladki ne yeh tweet 3 din qabal ki thi aur ab tak unki isi tweet par 13 hazaar se zayed afraad ne jawab diye hain, jin mein se ziyada tar afraad ne unki tareef ki. kayi afraad ne nojawan ladki ki walida ke liye dulha bhi tajweez kiye aur kaha ke modi aur bollywood adakar Anil Kapoor jaisay mard unki walida ke liye munasib dulha hain.
Baaz afraad ne inhen apni walida ke liye hindustani wazeer-e-dakhla Amit Shah aur super star Khan Salman Khan jaisay afraad bhi bator dulha tajweez kiye. Aastha Varma ke twitter handle ke mutabiq woh nail polish aritst hain aur woh is hawalay se online store bhi chalateen hain. unke twitter account se maloom hota hai ke woh shayari bhi karti hain, sath hi woh qanoon ki taleem bhi haasil kar rahi hain aur woh nazriati tor par mulhid aur nargist ka shikaar bhi hain. –YTN STAFF