Lucknow: Chief minister Uttar pardesh Yogi Adityanath Love Jihad par sakht qanoon bananay ki wakalat kar chukay hain is zimn mein aaj unki hukoomat ne insaaf wo qanoon shoba ko iska musevida bheja hai. sarkari zaraye ke Mutabiq love jihad par banaye jane walay qanoon ka musevida riyasat ke mehakma dakhla ne insaaf aur qanoon shoba ko rawana kardiya hai jiska jaiza liya ja raha hai. UP hukoomat ke daawa ke mutabiq is qanoon ka maqsad lalach, dabao, dhamki ya shadi ka dilasa day kar tabdeel mazhab ki rok thaam hai.
Zaraye ke mutabiq naye qanoon ke tehat love jihad qanoon ki khilaaf warzi karne walon ko 5 saal ki qaid hogi aur is mein ghair zamanti daf-aat aid ki jayengi. alawa azeen is naye qanoon mein sakht jurmane ki koi tajweez nahi hai. ghalib gumaan hai ke UP hukumat yeh bill assembly ke surmaee ijlaas mein paish kare. UP assembly ke surmaee ijlaas ka aaghaz aglay mahinay hoga, taham imkanaat yeh bhi hain ke jaldi ke khatir hukoomat bill se pehlay is par ordinence le aaye. Naye qanoon mein tabdeel mazhab ke liye dabao daalna mujremana amal hoga. reyasti wazeer qanoon ne kaha ke naye qanoon ka musevida jald hi awaami satah par paish kiyajaye ga, taakay is zimn mein awam ki aara bhi haasil ki ja sakein. Unhon ne kaha ke samaji hum ahangi ke liye is tarhan ke qanoon ki zaroorat hai. kayi ladkiyon ko unke naam aur mazhab ki tabdeeli par majboor kiya gaya hai jis par ab sakhti se pabandi laganay ki zaroorat hai.
Reyasti wazeer Mohsin Raza ne bhi hukoomat ke is faislay ka istaqbaal kiya hai. Mohsin Raza ke mutabiq aisay samaaj dushman anasir ki sarkobi ke liye is naye sakht qanoon ki zaroorat hai jo masoom ladkiyon ka faida uthatay hain. Wahein doosri janib all India muslim personal law board ke khatoon wing ki sadar saishta Ambar ne hukoomat ke is tarhan ke faislay ki sakht tanqeed karte hue love jihad qanoon ko aeen ki rooh ke khilaaf qarar diya.
Unhon ne kaha ke siyasi eqedeaar, mulki dastoor, hindustani tahazeeb wo mulk ka tahaffuz tamam shehrion aur hukumaton ka fareeza hai. Love jihad qanoon banakar hukoomat kiya saabit karna chahti hai. kisi makhsoos mazhab ko bunyaad banakar love jihad qanoon lana dastoor ke sath mulk ki mushtarqa waarsat par bhi ek bada hamla hai.