Room: Nojawan Tennis Star Lorenzo Musetti apni heran kun aur shandaar karkardagi ko jari rakhtay hue sabiq sare fehrist 5 khiladion ke khilaaf mutawatar doosri kamyabi haasil karte hue Italian open ke dosray marhalay mein Japan ke Kei Nishikori ko raast sets mein shikast day kar Lorenzo Musetti ne nasal ke Star ki hesiyat se apni saakh mazeed behtar banali hai. 18 sala Italian Super Star Musetti ne apne dosray Tour level ke pehlay hi match mein 3 martaba ke Grand Slam faateh Stan Wawrinka jo sabiq aalmi number 3 ki hesiyat se Tournament mein shareek thay inhen raast sets mein shikast di thi.
Is ke baad Musetti ne dosray marhalay ke muqablay mein saabit kiya ke pehlay marhalay ki kamyabi ittifaqi nahi thi kyunkay unhoun ne duniya ke sabiq number 4 aur 2014 ke US open Finalist Kei Nishikori ko 6 -3,6-4 se shikast day kar Room mein honay walay ATP masters 1000 event ke aakhri 16 mein jagah banai hai. Musetti ne is kamyabi ke baad heran kun nataij ke bar aks khud ko ek naye star khiladi ke tor par manwana shuru kardiya hai. Is kamyabi ke baad unhoun ne kaha ke mein hamesha ek jangju khiladi huwa karta lekin pichlle saal ke douran mujhe bohat se utaar chadhao dekhnay pade. Musetti ne 2019 mein Junior zumray mein Australian open khitaab haasil kiya aur rawan baras pesha war khiladi ki hesiyat haasil karte hi unhoun ne khud ko saabit karna shuru kardiya hai. Umeed ki jarahi hai ke agar Musetti ki raftaar yeh hi rahi to rawan Tournament ke quarter final mein un ka saamna aalmi number ek Nowak Djokovic se ho sakta hai.
French open se qabal Musetti ka urooj aur Nadal ki badshahat
Yaad rahay ke corona ki wajah se is martaba US open jo ke aam tor par season ka aakhri Grand Slam hota hai woh dosray Grand Slam ke tor par guzashta hafta munaqqid hochuka hai jis ke baad ab Season ka teesra Grand Slam French open shuru hona wala hai aur is ki tayari ke zimn mein Italian open khela ja raha hai. Yeh Tournament Clay Court mein khela ja raha hai aur is sust raftaar maidan mein Spain ke sabiq aalmi number ek Rafael Nadal ko be taaj badshah tasawwur kiya jata hai lekin jis terhan Musetti ne Clay Court ka season shuru kiya hai is ke baad French open mein dilchaspi mazeed badh chuki hai aur jaisa jaisa Italian open agay badhay ga waisay waisay Nadal aur Djokivic ke hamrah Musetti par tennis shaiqeen ko tawajah markooz hoti chali jaye gi.