Bangalore: Hindustan mein Coronavirus ka phelao roknay ke liye har mumkin koshish ki ja rahi hai, Lekin kuch leader aisay bhi hain jinhen is wabaki koi fikar nahi hai. Karnataka mein kuch aisa hi maamla samnay aaya hai jahan barsare eqtedar Party BJP ke rukan Assembly ne senkdoun mehmanoun ke darmain dhoom dhaam se apna yom-e-paidaiesh manaya aur phir sabi ko beryani bhi khilai gayi.
Waqea Karnataka ke Gubbi taluk ilaqa ka hai jahan Tumkur zila mein Turuvekere ke BJP rukan Assembly M Jayaram apna 51 we saalgirah ka jashnn mananay ke liye Lockdown ki khilaaf warzi karne se bhi peechay nahi hattay. Unhoun ne senkdoun baday aur bachoun ke darmain bada sa Cake kaata aur wahan par bilkul bheed jaisay mahol ke darmain kuch logoun ko khilaya bhi. Baad azan Birthday Party mein aeye mehmanon ko Beryani bhi khilai gayi.
Is Birthday Party ki kuch taswerain samnay aayi hain jin mein wo hathoun mein dastaana pehnay huve nazar aa rahay hain aur Cake kaat kar logoun ko khela rahay hain. Ek tasweer mein wo apne qareeb ek chhootey bachay ko Cake khela rahay hain, Ghaliban wo un ka beta hai ya phir koi qareebi rishta daar. BJP rukan Assembly tasweer mein bilkul dulhay ki terhan sajay huve aur pagdi lagaye huve nazar aa rahay hain. Paas mein kuch bachay Mask lagaye huve nazar aa rahay hain to kuch baday loog bhi Mask lagaye hain jab ke kayi loog baghair Mask aur dastanoun ke hain. Herani ki baat to ye hai ke sabhi sherka is terhan qataar mein khaday hain jaisay wo bhool hi gaye hain ke Hindustan kisi mohlik bemari se jung lad raha hai.
Qabil zikar hai ke Karnataka mein ab tak taqreeban 200 loog corona ke shikaar hogaye hain. Riyasat mein kayi logoun ki mout bhi ho chuki hai, Lekin aisay mahol mein bhi siyasi leaders apna Birthday dhoom dhaam se manate huve nazar aa rahay hain jo zahir karta hai ke wo kitney ghair zimma daar aur samaaj ke liye khatarnaak bhi hain. –YTN STAFF