Social Media par aik video Viral huwa tha jis mein aik naujawan, ladki ki buri tarha pitaayi karta dekhayi gaya tha. Wazeer e Dakhila Hind Mr. Rajnath Singh ney Commissioner Delhi ko tehqiqaat karne ka hukum diya tha jis ke baad is ko girftar karliya gaya.
New Delhi. Delhi Police ke aik Sub Inspector ke betay ke khilaaf ismat raizi aur ziyad-ti ka muqadma darj karliya gaya jis ko aik Video mein aik ladki ko buri tarha zad o kob karte huwe dikhaya gaya tha. Yeh Video Social Media par bahot ziyada viral huwa. Yeh video ghaliban Delhi ke Uttam Nagar mein waqay aik khangi daftar mein 2nd September ko li gayi thi. Iss video mein aik naujawan ko kohniyoon aur latoon se aik ladki ko zad o kob karte huwe dikha ya gaya jis ki shanakhat Rohit Tomar ke taur par ki gayi hai. Iss video mein woh ladki ko zameen par pataka huwa, Thapaden ghoonse aur lateen maarta huwa dikhayi diya aur ladki baar baar uss se maffi chaah rahi thi aur bakhash dainay ki ilteja kar rahi thi. Social Media par is video ke viral honay ke baad mukhtalif gooshon se is ki muzammat ki jane lagi aur uss ko kiafer e kirdaar tak pahonchaney ka mutaleba zor pakadney laga tha taham is ke khilaaf kisi qisam ki karwai nahi ki gayi. Wazeer e Dakhila Hind Mr. Rajnath Singh ki mudakhilat ke baad hi iss ki giraftari amal mein aayi hai. Unhon ney twitter par Commissioner Police Delhi ko hidayat di ke woh munasib tehqiqaat kere. Wazeer e Dakhila ne apne tweet mein kaha ”Aik ladki ko aik naujawan ki janib se buri terha zado kob karne ke video ke baaray mein mujhe ilm huwa hai. Mein ney Delhi Police Commissioner (Amuliya Patnaik) se phone par baat ki hai aur un se kaha hai ke munasib karwai ki jaye.” Ladki ko zad o kob kiye jane ki rerecording karne walay naujawan ki bhi aawaz record huwi jis mein woh keh raha tha ke Rohit, Ladki ko chod dey lekin is ka koi asar nahi huwa. Iss naujawan ko zad o kob karne se baz rakhney kisi ne mudakhilat nahi ki. Iss waqeye ke khilaaf jumeraat tak koi shikayat mauusool nahi huwi thi taham jab is be rahem naujawan Rohit ne apni sabiqa girlfriend ko yeh video bhaij kar dhamki di ke agar woh shadi se inkaar kardey gi to is ka bhi yeh hashar hoga. Jis par iss Ladki ney Police mein Rohit ke khilaaf shikayat darj karwai. Yeh naujawan Delhi Police ke aik Sub Inspector ka beta bataya jata hai.