Kuwait City: Kuwait ke public Prosecutor Dirar Al Asousi ney 8 khawateen ko Prosecution se taraqqi day kar Judge ke mansab par faiz kiya hai. Ab ye khawateen aala adalti council se is ki manzoori ki muntazir hain. Tafseelaat ke mutabiq Kuwait khaliji mumulk mein choutha mulk hai jahan khawateen judge ke mansab par faiz ki jarahi hain. Kuwait ki tareekh mein pehli martaba 8 khawateen judge bane gi.
Adalti zaraye ney kaha hai ke Kuwait ki Alla adalti council ka mangal ko ijlaas hoga. Jis mein khawateen ko judge banaye jaaney ke faislay ki manzoori di jaye gi. Ye khawateen September ke shuru se ba-hasiat judge kaam karna shuru kardenge.
Kuwait Parliament ke speaker Marzouq Al-Ghanim ne kaha hai ke judge ke mansab par Kuwaiti khawateen ke taqarrur ke faislay ka intezaar tha. Is ki badolat Kuwait khawateen taraqqi ke amal mein mazeed agay badheen ge.
Al-Ghanim ne Twit kiya ke Kuwait khawateen ke liye hazaar slot, Khawateen tamam mahdanoun aur shobo mein barsah baras se apni kamyabioun ke jhande gadh rahi hain.
Doosri taraf Kuwait ka ek tabqa khawateen ke bator judge taqarrur par nagwari ka izhaar kar raha hai. Is tabqa ne kaha hai ke judge ke ohday sirf mardoun ke liye hain. Ba-hasiat judge khawateen ka taqarrur na munasib hai.
Jin 8 khawateen ko pehli martaba Kuwait mein judge banaya ja raha hai un mein Lulwa Al Ghanem, Fatima Abdel Moneim, Fatima Al Kandari, Fatima Al Farhan, Bashayer Al Rakdan, Rawa Al Tabtabae, Sanabel Al Houti, aur Bashayer Abdul Jalil..
Yaad rahay ke Kuwait khaleej ke mulkoun mein pehla nahi jo adliya mein khawateen ka taqaror kar raha hai. Is se pehlay Emirate, Qatar aur Bahrain bhi apne yahan adliya mein khawateen ki taqaruryan kar chukay hain.