Hyderabad: Riyasat ke Municipal Administration aur shehri taraqqi ke wazeer K.T Rama Rao ne jummay ko kaha ke Greater Hyderabad Municipal Corporation ( GHMC ) ko ikhtiyarat aur taraqiyati mansooboun ke behtar nifaz ke liye taqseem kiya jana hai. unhoun ne hareef congress aur BJP par ilzaam lagaya ke dono partiyoun ne aindah munaqqid honay walay baldeati intikhabaat ke liye ittehaad kiya hai.
KTR ne media numaindoun se baat karte hue kaha ke, ye meri zaati raye hai ke GHMC ko taqseem karna hai aur hukoomat ka is se lena dena nahi hai. . Agar riyasat ke awam baldeyati intikhabaat mein hamein vote dete hain to, TRS 4 saal tak shehri baldeati idaroun mein taraqqi par tavajja day gi.
Unhoun ne kaha ke naye Municipal Act ko nafiz karna hukomat ke liye challenge hai. Wazeer ne tanqeed ki ke oppostion jamaatoun mein baldeati intikhabaat ke liye umeedwaroun ki kami hai aur hukmaran jamaat par tanqeed ke zareya naaqis tashheer ka sahara le rahay hain. Unhoun ne intikhabaat mein party ki ittihadi MIM ke sath ittehaad se inkaar kiya. –YTN STAFF