Hyderabad: Koi khud ko fouji, koi khud ko Dr, koi khud ko police ohdedar aur koyi kuch koi kuch zahir karte hue masoom awam ko dhoka day rahay hain aur ab taaza tareen waqea mein ek sabiq cricketer ne khud ko reyasti wazeer KTR ka PA zahir karte hue awam ko dhoka day raha tha jisay police ne giraftar karliya hai.
Tafseelaat ke mutabiq ek sabiq cricketer jis ne Ranji trophy ki satah par cricket ki duniya mein apni shanakht banai hai usay north zone task force ki janib se wazeer KTR ke zaati secretary zahir karne, chori aur bhatta khori mein mulawis honay ke ilzaam mein giraftar kiya gaya hai.
Mulzim ki shanakht 25 sala Naga raju sabiq cricketer ke tor par hui hai. Police ne kaha hai ke Naga raju is se qabal dono Telugu reyaston mein ja-al saazi ke 7 muqadmaat mein mulawis hai.
Police ke mutabiq mulzim ne guzashta haftay Hyderabad mein drug and pharmaceutical company ke intizamia ko dhamki amaiz phone kiya tha.
KTR ke zaati Muawin ( PA ) Tirupati reddy ki naqali karte hue mulzim ne daawa kiya ke aaloodgi control board factory ko bandish notice jari karne jaraha hai. Board ki janib se karwai roknay aur unke liye masla hal karne ke liye 15 laakh rupay talabb kiye. Intizamia ne police se rabita kiya aur iske baad Task force ke jawano ne ek jaal bichwaya aur der raat gaye KTR ke is farzi PA ko girftar karliya. farzi PA ko girftar karne ke baad police masroof tehqiqaat hai aur gumaan kiya ja raha ke kayi ek mamlaat par se parda utthega kyunkay is ke kayi aur mamlaat mein mulawis honay ke imkanaat ko mustard nahi kiya jasakta.