Amravati. Zila Nanded main Dharmabad ki adalat ki janib se nonbailable arrest warrant se mutaliq dilchasp inkeshaaf karte huwe Chief Minsiter Andhra Pradesh N Chandrababu Naidu ney kaha ke unhen ta haal aisa koi warrant mausool nahi huwa hai. Qanoon tanzeem jadeed Andhra Pradesh par amalaawri par mukhtasir muddati waqfa e sawalaat ke dauran Assembly mein baat karte huwe Mr. Chandrababu Naidu ney kaha ke unhen adalat se kisi qisam ki communication mausool nahi hui hai jaisa ke is barey mein chand dinon qabl khabrain manzar aam par aayi theen. Unhon ney kaha ke woh is masla par mutaliqa ohdedaron se tabadla e khayaal kiye hain aur is par munasib iqdaam kiya jaye ga. Unhon ney kaha ke unhen Andhra Pradesh ki sarhad par Maharashtra Police ney girftar kiya tha magar riyasat mein nahi. Uss waqt Maharashtra Police ney kaha tha ke Telugu Desam Party leaders ke khilaaf koi case nahi hoga aur unhen khusoosi flight ke zariye Hyderabad bhej diya gaya tha. Lekin ab achanak yeh khabar aayi hai ke adalat ney nonbailable arrest warrant jari kiya hai. Unhon ney kaha ke Babli project ki taameer ghair qanooni thi. Unhon ney wazahat ki ke yeh project, Godavari River par SRS project ke hudood ke andar hai. Shumali Telangana ke kisanon ko is project ki takmeel par dariyaee pani parapne haq se mahroom hona pade ga.