Dhaka: Sheikh Mujeeb Ur Rehman ki 100 we yom e paidaiesh ke zimn mein Bangladesh 2 muqabloun ki T20 Series karwa raha hai jis mein Kohli un 6 Hindustani khiladioun mein shaamil hain jo ke Asia Eleven Team ka hissa banin ge. Hindustani Cricket Team ke Captain Virat Kohli se umeed ki jarahi hai ke wo aindah mah Dhaka mein munaqqid World Eleven ke khilaaf T20 Series ke ek muqaabla ke liye Asia Eleven Team ka hissa honge.
Captain Kohli ke ilawa KL Rahul bhi ek muqaabla ke liye Team ko dastyab rahen ge lekin Dhekhar Dhawan, Rishad Pant, Kuldeep Yadav aur Mohammad Shami dono muqabloun ke liye Team ko dastyab hain. Bangladesh Ccricket Board ( BCB ) ke sadar Nizam Ul Hasan ne dono Teams ke khiladioun ka elaan kiya hai.
World Eleven Team mein faf du Plessis, Chris Gayle, Rashid Khan aur Jonny Bairstow ahem khiladioun mein shaamil hain. Darin asna BCB ne kaha hai ke Kohli ek muqaabla khelain ge lekin BCCI hanooz Captain ki towseeq ka intezaar kar rahi hai kyunkay Hindustani Board apne Captain par zayed cricket ka boojh nahi daalna chahta.
Hindustan ka New Zealand ke khilaaf dosra Test 4 March ko khatam hoga jis ke baad wo janoobi Africa ki 3 muqabloun ki One Day Series mein 12 ta 18 March maizbani kere ga. Dhaka mein 2 muqablay 21 aur 22 March ko muqarrar kiye gaye hain jis ke baad 29 March ko IPL shuru hoga. Is series ke liye duniya bhar ki Teams se chand ahem aur maroof khiladioun ko muntakhib kiya ja raha hai taakay muqabloun ko awaami dilchaspi ka samaan banaya jaye. –YTN STAFF