New Delhi : Markazi hukoomat ke mutanazia teen zarayi qawaneen ke khilaaf saraapaa ehtijaj kisaan Tractor rally police se tassadum ke baad ek nakhush gawaar waqea mein tabdeel hogayi jis mein 1 shakhs ki mout bhi hogayi hai.
Delhi mein halaat kharab honay ki wajah se kayi maqamat per Internet khidmaat bhi moattal kardi gayi hain.
kisanon aur police ke darmiyan zabardast tassadum hua jis mein police ne laathi charge kya aur ansoo gas ke golay daghe jiske baad halaat aur bhi kharab hogaye. Jhadap ke douran Uttarakhand se talluq rakhnay walay ek kisaan ki mout hogayi hai. Isi afra tafri ke mahol mein kisanon ne laal qilah pahonch kar tareekhi imarat par apni tanzeem ka jhanda lehra diya.
Rally pur-tashaddud waqea mein is waqt tabdeel hogaye jab Delhi police ki janib se rally ke liye tay kardah rasta ki bajaye kisaan muzahireen ki badi tadaad dosray rasta se Delhi mein daakhil hui aur laal qilah tak pohanchanay mein kamyaab hogaye.
Senkdon kisanon ne apne hathon mein apni tanzeem ke jhanday thaamay hue thay. un mein se ek kisaan ne agay badhatay hue laal qilah par lagey khambay par apna jhanda lehra diya.
Kisaan Parade nikaalte ke douran police ke sath honay wali jhadap mein ek kisaan ki mout hogayi hai. Tafseelaat ke mutabiq yeh kisaan Uttarkhand ka shehri hai aur iska naam navneet bataya ja raha hai. Muzahireen ka ilzaam hai ke Navneet ki mout police ki goli lagnay se hui hai .
Is se pehlay kisaan singhu border, ghazi pur border samait kayi border par barricade toar kar Delhi mein daakhil hue. Is douran Muakraba chowk, tansport nagar, Noida, akshar dhaam par police ke sath kisanon ka tassadum hua. kisanon ko roknay ke liye police ne ansoo gas ka istemaal kiya aur lathyan chalayein lekin kisaan tassadum ke sath agay badhatay gaye. ITO ke paas badi tadaad mein kisaan Tractor ke sath India gate ki taraf badhne lagey. Police ne muzahireen ko roknay ki koshish ki lekin woh agay hi badhatay hi rahay. Inhen roknay ke liye police ne laathi charge kya aur ansoo gas ke golay chhodey .
Singhu border se niklay kisanon ke jithey aur police ke darmiyan Mukaraba chowk par tasadum hua hai. kisanon ka Tractor March Mukaraba chowk se kanjhola ka rasta muqarrar tha lekin aakhri waqt par kisanon ne apna rasta badal diya aur woh outer ring road ki taraf chal pade. Is douran kisanon aur police ke darmiyan tassadum hua, jis mein kayi kisaan aur police ohdedar zakhmi hue.