Hyderabad: Greater hyderabad municipal corporation ( GHMC ) ke intikhabaat chand ek mamooli noiyat ke tanaziyat ke darmiyan par aman andaaz mein mukammal hue lekin ibtidayi maloomat ke mutabiq raye dahi ka feesad kaafi mayoos kin raha jabkay social media mein chand ek aisi tasaveer bhi dekhnay ko mili hain jis mein polling both par mojood ohdedar raye dahindon ki Adam mojoodgi ki wajah se meethi neend se lutaf andoz ho rahay thay.
Ek janib jahan aam raye dahindon ki janib se haq raye dahi se istifada mein dilchaspi ka muzahira nahi kiya gaya to Dosri janib kayi ek Maroof shakhsiyation ki janib se haq raye dahi ke liye kaafi josh wa-kharosh ka muzahira kiya gaya jis mein khaas kar TV, film aur sports ki duniya se talluq rakhnay walay kayi naam shaamil hain. alawa azeen kayi ek ma-umar afraad ko bhi wheel chair par bowling both par dekha gaya hai. Haq raye dahi ke baad un ma-umar afraad ko media numaindon se izhaar khayaal bhi karta hua dekha gaya hai.
Is khusus mein ward number 95 ke liye polling both number 41 par apne haq raye dahi se istifada karne pohanchi 78 sala khatoon Khurshid begum media numaindon ki tawajah ka markaz thi. alawa azeen unke humra hay unki bahu Durdana Arshi ne kaha ke corona ki wajah se bachon aur buzurgon ka bahar niklana bilkul band hi hogaya tha lekin yeh dastoori haq hai aur hyderabad ki tahazeeb ko mustahkam karne ke liye is martaba vote ka istemaal bhi zaroori tha. Is mauqa par apne vote se istifada karne par ma-umar shehri Khurshid begum kaafi masroor deekhaee di.
Yaad rahay ke is martaba hyderabad ke baldi intikhabaat mein bjp ne edihi chouti ka zor laga diya tha aur hyderabad ki ganga jamni tahazeeb ko bigaadnay ki har mumkin koshish ki lekin doosri janib secular aur aman pasand Hyderabadiyoun ne apne vote ko sharpasnad anasir ke khilaaf hathyaar ke tor par istemaal kiya jis mein Khurshid begum jaisay ma-umar shehri sare fehrist rahay