Vishakhapatnam: Zindagi ke mukhtalif shoba jaat se talluq rakhnay wali khawateen ne mutahidda AP ke sabiq wazeer-e-aala YSR Rajasekhar Reddy ke Vishakhapatnam mein waqay mujasma par behan aur bhaieyon ki atot mohabbat ki alamat Raksha Bandhan ke mauqa par rakhi bandhi aur Rajasekhar Reddy se apni atot wabastagi ka izhaar kiya. Hukmaran jamaat YSR Congress ke shoba khawateen ki leader G Laxmi ne apne arakeen khandan aur deegar khawateen ke sath poanch kar mujasma ko rakhi Bandhi. Is mauqa par unhoun ne kaha kay Rajasekhar Reddy un ke liye bhai ke tor par hunooz zindah hain.
Isi douran wazeer-e-aala YS Jagan Mohan Reddy jo Rajasekhar Reddy ke farzand hain ney Twit karte hue riyasat ke awam ku rakhi tehwar ki mubarakbaad pesh ki. Unhoun ney angrezi zabaan mein kiye gaye apne Twit mein kaha ke ye tehwar bhai aur behnoon ke atot mohabbat ki alamat hai. Is waba ke mauqa par bhi tehwar ka jazba hanoz dekha jaraha hai. Riyasat ki meri tamam behnoon ko mein is tehwar ki mubarakbaad pesh karta hon. Isi douran Andhra Pradesh Industrial Infrastructure Corporation ( APIIC ) ki sadar nashin-o-hukmaran jamaat YSR Congress ki leader Roja ney nishandahi ki ke wazeer-e-aala Jagan Mohan Reddy jinhon ney khawateen ki salamti ke liye kayi iqdamaat kiye rakhi tehwar ke mauqa par ek ahem qadam uthaya hai.