Dubai: Khaleeji mumalik mein Novel Coronavirus se sahet yab afraad ki tadaad musalsal bhedne lagi. Bahrain ne virus se nimatnay ke liye naye iqdamaat ka elaan kiya hai. Muqami media ke mutabiq Bahraini kabeena ne haft roza ijlaas ke mauqa par kaha ke July se 3 mah tak tamam shehrioun ke makanaat ke bijli-o-pani ke bil hukoomat hi ada kere gi.
Bahraini wizarat sahet ke mutabiq coronavirus se 736 mutasireen sahet yab hogaye hain. 24 ghantay ke douran 7274 afraad ka Corona test liya gaya. 438 naye maqamat report huve jabkay sahet yab afraad ki tadaad 20517 tak poanch gayi hai.
Bahraini wizarat sahet ne ye bhi bataya hai ke corona ke 74 mamlaat fa-aal hain. Un mein se 41 intahi nighdasht ke shobay mein zair e ilaaj hain jabkay 5064 ki haalat khatray se baher hai. Saudi Arab mein mutasireen ki tadaad 1 lakh 86 hazaar 436 tak poanch gayi hai. Un mein se 57719 mutharrak mamlaat hain jabkay 2285 ki haalat naazuk hai.
Tarjuman ne kaha hai ke virus se shifa panay waloun ki tadaad 1 lakh 27 hazaar 118 hogayi. Mulk mein virus se ab tak marnay waloun ki tadaad 1599 Record ki gayi hai. Kuwait ne kaha hai ke is ke yahan coronavirus se shifa panay waloun ki jumla tadaad 36313 hogayi hai. Mutasireen ki tadaad 45524 aur marnay waloun ki tadaad 350 hai.
Saltanat Amman mein mutasireen ki jumla tadaad 39060 hogayi aur shifa yab afraad ki kul tadaad 22422 hochuki hai. Amman mein virus se marnay waloun ki tadaad 169 hai. Qatar ki wizarat sahet ne kaha hai ke is ke yahan mutasireen ki yomiya tadaad May ke muqablay mein ziyada huvi hai, Taham mutasireen ki majmoi tadaad mein kami waqay huvi hai. Qatar mein virus se 80170 afraad shefayab ho chukay hain.