Washington: America ke wazeer kharja (Secretary of State) Mike Pompeo ney khaleej mein tail bardaar jahazoo par hamlon ke hawala se Iran ki tanqeed karte huwe kaha hai ke America khitta mein tail ki azadana rasad ko yakeeni banaye ga. Report ke mutabiq Fox News ko aik interview mein Pompeo ney kaha ke aap ko yeh tasawwur karna chahiye ke hum yahan se tail ki azadana sarbarahi ko yakeeni bananay jarahay hain. Yeh aik aalmi imthehaan aur poori duniya ke liye ahem hai aur America safarti aur deegar tamam wasail browe car laatay huwe mo-asar nataij haasil kere ga.
Tail bardaar jahazoo par huwe hamlon ki zimma daari Iran par ayed karte huwe unhon ney kaha ke jo kuch yahan huwa woh ghalti se nahi huwa. Yeh islami jamhoori Iran ki janib se tijarti jahazoo, azadana naqal o harkat par hamla they jis ka wazeh maqsad yahan se tail ki sarbarahi ko rokna tha. Amrici Secretary State ney is hawala se kis terha ki karwai hogi is par koi ishara nahi diya taham Iran ko shadeed tanqeed ka nishana banaya. Khayaal rahay ke duniya ki aik tahai tail ki sarbarahi abnaye Hurmez se hokar guzarti hai jo Iran ke shumal ke chhootay se hissay se guzarti huwi khaleej aur khaleej Amman taq phaily huwi hai. Qabal azeen 13 June ko khaleej Amman mein tail bardaar do jahazoo pur hamla kiya gaya tha taham jahazoo ke amlah ko bahfazt nikaal liya gaya. Guzishta mah fjirh ke sahili shehar ki bandargaah par 4 jahazoo mein takhreeb kaari ki koshish par mutahidda arab amarat ki janib se muzamati bayan samnay aaya tha, taham is se qabal woh sahili ilaqay mein kisi bhi qisam ke hamlon ki tardeed kar rahay they.
Baad azan Saudi Arab ney kaha ke saahil par takhreeb kaari ka nishana banaye jane walay 4 jahazoo mein se 2 tail bardaar jahaaz un ke hain, jinhein hamla mein shadeed nuqsaan pouncha tha. Mashriq wasti mein Oil tanker par honay walay hamlon aur Chaina America tijarti kasheedgi ke paish e nazar aalmi maeeshat par daboo ke baad sarmaya karon aur taajiron mein tashweesh ki sorat e haal peda honay par aalmi manndi mein tail ki qeematon mein bhi izafah hogaya tha.
Mutahidda arab amarat ney rawan hafta huwe hamlay ke baad aalmi baradri se tail ki sarbarahi ko mehfooz bananay ka mutalba kiya tha. Saudi Arab ke Prience Mohammad Bin Salman ney tail bardaar jahazoo par hamlon ki zimma daari Iran par ayed karte huwe kaha ke hamaray Mulk ko di jane wali dhamkion se nimatnay ke liye kisi qisam ki hichkichahat mehsoos nahi karen ge. Mohammad Bin Salman ke bamoujib hum khittay mein jung nahi chahtay lekin hum –apne awam ko, Mulk ke istehkaam ko aur apne mafaad ko di jane wali dhamkiyon ka jawab dainay mein hichkichahat mehsoos nahi karen ge. Iran ney Tehran mein japaani wazeer e azam ke maheman honay ka bhi khayaal nahi kya aur un ki safarti koshisho ka yun jawab diya ke khittay mein 2 tankers par hamla kiya gaya jin mein se aik japaani tha.