Chief Minister par MIM aur Left Party parties ake ishaaron par kaam karne, tauham parasti mein mubtela honay aur waadon ko poora na karne ka ilzaam. 10 din baad BJP sarbarah ka dobarah daura Telangana
Hyderabad. Sadar Bharatiya Janata Party Mr. Amit Shah ne aaj Telangana mein Assembly ke liye party ki intekhabi muhim ka amlan aaghaz kardiya. BJP sarbarah Begumpet Airport se khusoosi Helicopter ke zariye Mehboob Nagar ke liye rawana hon ge jahan who ek jalsa se khitab karenge. Mr. Amit Shah ney Chief Minister o Sadar Telangana Rashtriya Samiti Mr. K Chandrashekar Rao par sakht hamley karte huwe intekhabi muhim ka aaghaz kiya hai. Unhon ney Mr. Chandrashekar Rao par khushamdi siyasat karne ka ilzaam aayed kiya. Mehboob Nagar rawaangi se qabal Press Conference se khitaab karte huwe Mr. Amit Shah ney Mr. Chandarshekar Rao par All India Majlis Ittehad ul Muslimeen aur Left Parites ki imaa par kaam karne ka ilzaam aayed kiya. Unhon ney kaha ke agar TRS dobarah Iqtedaar par wapas aati hai to woh Vote Bank siyasat kere gi. Unhon ney istefsaar kiya ke aqliaton ke liye 12% tahaffuzaat ki tajweez paish karna ‘khushamdi siyasat’ nahi hai? Woh jantay hain ke hamara dastoor mazhab ki asaas par tahaffuzaat ki ijazat nahi deta. Agar yahi hukoomat dobarah aaye gi to riyasat mein Vote Bank siyasat jari rahay gi. Sadar BJP ney KCR se ‘Aik Mulk aik intekhabaat’ par apna muaqqaf zahir karne ka mutaleba kiya aur kaha ke party jis ney ibtida mein bayak waqt intekhabaat ki himayat ki thi bad qismati se agay badh gayi aur iss ko bigaad diya aur Assembly ko tahleel kardiya. Unhon ney kaha ke Mr. Chandrashekar Rao ney aik choti riyasat ko do alhdah intekhabaat (Assembly aur Lok Sabha ) ke ikhrajat bardasht karne par majaboor kardiya. Mr. KCR ney apne buland bangh waadon ko wafa nahi kiya hai. Mr. Shah ney Chief Minister par aam aadmi par maali boojh aayed karne aur tauham parasti mein mubtala honay ka ilzaam aayed kiya. Unhon ney mazeed kaha ke party Telangana mein tamam nashiston par muqaabla kere gi aur riyasat mein aik mazboot aur faisla kun taaqat ban kar ubhrey gi. Mr. Amist Shah aik roza daura par aaj subah yahan pahhonche hain aur woh Telangana mein Party ki intekhabi hikmat e amli aur intekhabi manshoor ke baaray mein reyasti qaayideen ko hidayat den ge. Sadar Telangana BJP Dr. K Laxman ke mutabiq BJP sadar mukhtalif groups ke hamrah ijlaas mein shirkat karen ge aur woh puranay shaher ki aik mandir ka bhi daura karen ge. Unhon ney bataya ke Mr. Amit Shah 10 din baad dobarah Telangana ka daura karen ge aur Karimnagar mein aik jalsa aam se khitaab karen ge.