Hyderabad: TRS supremo aur chief minister KCR ki Sahebzadi, Nizamabad MLC Kalvakuntala Kavitha pehli martaba party ke star campaigner ki haesiyat se GHMC intikhabaat mein TRS ke liye intikhabi muhim chalayeingi.
Kavitha apni intikhabi muhim ke douran ziyada tar vardon ka ahata karengi. TRS ke sarkari zaraye ne inkishaaf kiya hai ke party ki qayadat ne Hyderabad ke shehrion, taleem Yafta noujawanon aur darmiyana tabqay ke logon mein zabardast taawun haasil karne wali Kavitha ki khidmaat ko barooay car laane ka faisla kiya hai.
Kavitha jo ke Social Media par sargaram hain, GHMC ki hudood mein IT ke maahir shehri nojawanon ke sath achay raabtey rakhti hain. Social media platforms par unki maqboliat ka andaza is baat se lagaya jasakta hai ke unhon ne September mein Twitter par lakhoun followers hai aur ye karnaama sir anjaam denay wali junoobi Hindustan ki pehli khatoon siyasatdan ban gayeen. saal 2016 ke GHMC intikhabaat mein Kavitha ke badey bhai aur IT wazeer KTR hi party ki intikhabi muhim ki qayadat karne walay thay lekin is martaba Kavitha KTR ke sath TRS ki intikhabi muhim mein bator-e-star shaamil hongi.
October mein BJP aur congress ko bhaari aksariyat se shikast day kar nizaamabad local authority ki MLC nishist jeet kar reyasti siyasat mein daakhil honay honay wali Kavitha ko maqboliat ko istemaal karne ka faisla kiya gaya hai. GHMC ki intikhabi muhim mein Kavitha ki party mein unhein di jarahi ahmiyat ki akkaasi karti hai. BJP GHMC mein Dubbaka nataij ko dohranay ke liye poori tarhan mutharrik hai, TRS qayadat GHMC intikhabaat ke liye Kavitha ko intikhabi muhim ki zimmedaari saump kar apni kamyabi ke imkanaat ko roshan karne ki khwahan hai.