Srinagar: Alehdgi pasand rehnuma aur hurriyaat conference chairman Syed Ali Geelani ney Kathua Ismat rezi aur qatal muqadma par sunaye jane walay faisla par apne tahaffuzaat ka izhaar karte hue kaha ke ek be gunah masoom bachi ko jis wehshi aur darindgi se Ismat rezi ke baad qatal kiya gaya is ney riyasat ke awam hi nahi, balkay poori insaaniyat ko hila ke rakh diya. ghareeb aur muflis tabqay se taluq rakhnay walay un afraad ko ek gehri aur sochi samjhi saazish ke tehat wahan se bhaganay ke mansoobay par amal karne ke liye holnaak waardaat anjaam di gayi jis se poori insaaniyat saramshar hokar reh gayi .
Unhon ney kaha ke is darindgi aur akhlaq bakhta harkat karne walon ko phansi day kar kafer kirdaar tak pohanchaya jana chahiye tha taakay aisi soch aur zehniat rakhnay walon ke bojh se zameen ke seenay ko bhi saaf kiya jasakta. aisay khun khawar darinde aur un ki bemaar aur wehshi zehniat poori zindagi jailon mein reh kar bhi aisay mansoobay bananay aur unko apne baqi sathiyon ki madad se amlaye ke liye uksaati rahaygi jis se muashray aur khaas kar mehkoom aur majboor tabqa khauf wo hiraas mein hamesha mubtala rahayga.
Geelani ney insaaf ke bakol unke dohray miyaar ke badhatay hue waqeat par par shadeed tanqeed karte hue kaha ke ek taraf siyasi bunyadon par ek be gunah ko ijtimai zameer ki tasalii ke liye suli par chadhaya jata hai aur doosri taraf 8 sala masoom bachi ko darindgi ka nishana bananay walon ko jailon ke maheman banakar Umar bhar ke liye paalne ka faisla sunaya jata hai. beti bachao aur beti padhao ke pur-fareb naaray laganay walay kamsin betiyoun ko zindah dargor karne walon ke sath is tarhan ki riayat kaisay barat sakte hain?
Unhoun ney is sharamnaak waqea ke asli mujrim ke betay ko shak ka faida dainay par afsos ka izhaar karte hue kaha ke is wehshi darinde ko kisi bhi haalat mein koi riayat nahi di ja sakti. 18 mah ke taweel intezaar karne ke bawajood is kamsin bachi ke ghareeb aur be-aasra walidain ko apni badnaseeb lakht-e-jigar ke qatilon ko zindah dekh kar mayoosi hui hogi .
Ab jurm ko bhi firqa waranah rang day kar kabhi mujrimoun ko phool mala pehna kar inhen qanoon bananay ke aiwanon tak pohanchaya jata hai to kahin darindgi aur safakiyat mein mulawis honay ke bawajood mujrimoun ko riayat day kar hamdardian haasil ki jati hain aur agar aisi nahaj ko taqwiyat aur parezrayi mili to yeh muashra darindon, choron, luteron, qatilon aur ghundon ke liye ek mehfooz jaye panah ban sakti hai. phir beti bachao ke pur-fareb naaron se vote bator kar Iqtidaar to haasil kiya ja sakta hai, lekin muashray ki bunyadein khokhli hokar poora muashra zameen bose hojayega. kiya insaaf dainay walay idaray aisay hi din ke intezaar mein baithy hain ?
yaad rahay ke peer ko district and sessions judge Pathankot Dr Tejwinder singh ney Kathua ismat rezi wo qatal waqea ke mansoobah saaz wo sabiq sarkari ohdedar Sanjiram, Parvesh kumar aur SPo deepak Khajooria ko ta hayaat qaid ki saza jabkay deegar teen Bashamole SPo Surendar kumar, sub inspector Anand Dutta aur head constable Tilak raj ko paanch paanch saal qaid ki saza sunai. judge ney Sanji raam ke betay vishal Jangotra ko thos shawahid ki Adam mojoodgi ki bina par bari kardiya. –YTN STAFF