Sri Nagar: Markazi wazeer mumlikat baraye dakhla G. Kishan Reddy ne Jammu Kashmir Peoples Movement ke tarjuman Dr Ghulam Mustafa Khan ke sath ek mulaqaat ke douran kaha hai ke Jammu Kashmir ki ilaqai siyasi jamaatoun ke siyasi leaderoun ke sath hamein koi zaati dushmani nahi hai aur unhen anqareeb reha kiya jaye ga. Jammu Kashmir ke jumla taraqiyati kaam tarjeehi bunyadoun par anjaam diye jayen ge.
Dr. Mustafa Khan ne Delhi mein huvi is mulaqaat ki tafseelaat faraham karte huve kaha ke qareeb adhay ghantay ki is mulaqaat mein mahboos siyasi leaderoun khaas kar Peoples Movement ke Chairman Dr. Shah Faisal ki fori rihayi ke alawa Jammu Kashmir ke baray mein 3 ahem umoor aur zelah Bandipora ki taraqqi ke kayi umoor zair behas aeye.
Unhoun ne kaha ke Reddy ne yaqeen dehani ki ke waadi ke mahboos siyasi leaderoun ko anqareeb reha kiya jaye ga, Un ke sath hamari koi zaati dushmani nahi hai. Reddy ne saal guzashta ke mah November mein bhaari barf se tabah huve Bagh malikaan ko muawza dainay, Kisanoun ke CC qarzoun ki maffi Kachhar aur Bakraal tabqay ko allag kote ki farahmi ke hamaray mutalboun par ghor karne ki bhi yaqeen dehani ki.
Hum ne zila Bandipora ke taraqiyati umoor bilkusos Bijli, Dawakhanoun, Sadkoun aur Pani ke masail bhi uthaye jinhein hal karne ka unhoun ne wada kiya. Qabil zikar hai ke saal 2010 beech ke UPSC topper Dr Shah Faisal ne saal guzashta Bureaucracy se kinara kashi karkay maidan siyasat mein utarkar awam ow khaas ko herat mein daal diya tha. Unhoun ne guzashta baras March mein apni siyasi jamaat Jammu o Kashmir Peoples Movement ko huva badlay gi naaray ke tehat muta-arif kiya tha.
Guzashta baras June mein Shah Faisal aur aawami ittehaad Party ke sarbarah Eengineer Rasheed ne Peoples United Front ke banner ke taley akhatta honay ka elaan kiya tha. Unhoun ne 45 nakaat par mushtamil agenda of Alliance bhi jari kiya tha aur Rngineer Rasheed ne daawa bhi kiya tha ke Jammu o Kashmir mein agli hukoomat Peoples United Front ki hogi.
Markazi hukoomat ke 5 August ke faisloun ke pesh e nazar Shah Faisal ko 14 August 2019 ko nai Delhi ke bain ul aqwami Airport par is waqt hirasat mein liya gaya tha jab wo America rawaangi ki tayari mein they taham 14 Feb ko jab un ki nazerbandi ke muqarara 6 mah mukammal huve to intizamia ne un par PSA ka itlaq kiya taakay inhen mazeed waqt tak ke liye band rakha jasakay. –YTN STAFF