Srinagar : Srinagar mein sardiyoun mein izafah honay ki wajah se, jammu wo Kashmir intizamia ney itwaar ke roz santour hotel mein nazar band 34 siyasi qaidyoun ko MLA guest house bhejnay ka faisla kiya hai, kyunkay hotel mein munasib intizamaa nahi hain. ohdedaroun ke mutabiq, sardi ki wajah se National Conference, PDP aur peoples conference ke rehnumao aur Maroof samaji kaarkunon aur inki hifazat mein lagey fojion ki sahet mutasir ho rahi hai.
Wazeh hoke, un rehnumao ko 5 august ko dal jheel ke kinare waqay hotel mein rakha gaya tha. isi din hukoomat ney aaeen ke Article 370 ko mansookh karne aur riyasat ko 2 markazi ilaqoun mein taqseem karne ka faisla kiya tha. srinagar sameit waadi Kashmir mein sard hawa chal rahi hai, is mah ke shuru mein season ki pehli barf baari hui. Isi ke sath hi, nai tashkeel shuda union ilaqa ki intizamia mausam sarma ke liye srinagar se jammu muntaqil hogayi hai.
Un siyasi qaidyoun mein peoples conference ke sajjad lone, national conference ke Ali Mohammad sagar, PDP ke Naeem Akhtar aur sabiq IAS officer Shah Faisal shaamil hain. –YTN STAFF