Srinagar : National Conference ke sadar wo rukan-e-parliment Dr Farooq abdullah ney kaha ke pur aashob daur mein Kashmir ka siyahati shoba sab se ziyada mutasirah hua hai aur kisi had tak media ney bhi Kashmir ke baare mein manfi reporting kar ke baahiri duniya ke samnay ghalat ta-assur paish kiya.
Apni rahaish gaah par siyahati shoba se wabsta naamwar shaksiaat ke sath tabadlah khayalat karte hue NC sadar ney kaha ke bad qismati se Kashmir ke baare mein manfi propaganda aaj bhi jari hai. halaat ki kharabi ki wajah se waadi ko mushtaba maqam qarar diya ja raha hai. lekin tareekh gawah hai Kashmir mein kabhi bhi kisi bhi sayah ko nishana nahi banaya gaya hai aur yahan ke logon ney hamesha sayaho ki be los maheman nawazi ki hai aur mushkil adwaar mein bhi logon ney sayaho ko apne gharon mein panah di. Kashmir mein jis khush akhlaqi aur khush usloobi ke sath sayaho ki maheman nawazi ki jati hai aisi misaal duniya ke kisi bhi konay mein dekhnay ko nahi millti hai .
Farooq abdullah ney kaha ke zaraat wo baghbani, hand handicrafts aur sarkar ke baad sayahat aisa choutha shoba hai jis ke sath sab se ziyada logon ka rozgaar juda hua hai. lekin TRP ki bhukhi qaumi TV channelon ney apne haqeer mafadaat ke liye Kashmir ko istemaal kiya aur iski ghalat tasweer berooni duniya ke samnay rakhi. beshtar channel Kashmir ko badnaam karne ka koi bhi mauqa haath se jany nahi dete aur kashmirion ko nishana bananay mein koi kasar baqi nahi chodtay. is rujhan ki wajah se waadi ke awam khusosan noujawanon mein narazgi aur ehsas beygangi hadd se ziyada badh gayi hai .
Unhon ney shoba sayahat se talluq rakhnay walay afraad par zor diya ke jab tak riyasat mein awaami hukoomat ka qiyam amal mein nahi aata tab tak aap ko Kashmir ke baare mein manfi propaganda ka toar ney ka bera khud uthana hoga kyunkay governor intizamia is muamlay mein khoob ghaflat mein hai aur riyasat ka siyahati shoba buri tarhan mutasir ho raha hai . –YTN STAFF