New Delhi: Apni Captani mein Hindustan ko 1983 mein pehli martaba aalmi Champion bananay walay Kapil Dev ku dil ka dora pada aur un ku dar-al-hakoomat Delhi Fortis Hospital mein Angioplasty surgery huvi. Kapil is waqt ICU mein hain aur un ki haalat mustahkam batayi jarahi hai. World Cup jeetnay walay captain ko kal der raat seenay mein dard huwa tha jis ke baad woh raat 1 bajey Okhla ke Fortis Hospital puhanche. Fortis ke jari kardah ek bayan mein kaha gaya hai ke Kapil seenay mein dard ki shikayat le kar dawakhana puhanche. 62 sala Kapil Dev ka muaina kiya gaya aur Department of Cardiology ke Dr Ail Mathur ne raat ko hi Kapil Dev ki Angioplasty surgery ki. Inhen ICU mein rakha gaya hai aur woh Dr Mathur aur in ki team ki nigrani mein hain.
Fortis ke bayan ke mutabiq Kapil ki haalat mustahkam hai aur tawaqqa hai ke unhein aglay chand dinon mein ghar jane ki ijazat di jaye gi. Kapil ko dil ka dora padney ki khabar par social media par un ke lakhoon madahon ne un ki sehat yabi ke liye dua ki hai. Cricket Legend Sachin Tendulkar, Hindustani Captain Virat Kohli, Sabiq Cricketer Gautam Gambhir, Congress rehnuma Shashi Tharoor, Sabiq Cricketer Irrfan Pathan, Commentator Harsha Bhogle, IPL team Raajsthan Royals ke of Spinner Ravichandran Ashwin aur un ke mutadid madahon ne Kapil ki sehat yabi ke liye dua ki hai, Kapil fi al haal IPL ke douran ek TV channel ke sath kaam kar rahay thay. Kapil ki captani mein 1983 mein Hindustan ne pehli martaba World Cup jeeta tha. Kapil ne apne bain ul aqwami Career mein 131 test aur 225 ODI khailay. Un ke naam 5248 runs aur 434 wickten hain. ODI career mein unhoun ne 3783 runs ke sath 2583 wickten haasil kee.