Ajmer : Qaumi khawateen congress ki saddar Sushmita Dev sameit khawateen umeedwaron ki kamyabi ki dua karte hue khawateen congress ki ohdedaran ney Rajsthan ke Ajmer shehar mein waqay duniya bhar mein maqbool khwaja Moin uddin Chishti ki dargaah par chadar chadhai .
Sushmita Dev Assam se lok sabha intikhabaat lad rahi hain. Ajmer khawateen congress ki sadar Saba Khan ki qayadat mein khawateen congress leadroun ki team dargah shareef ke nizaam darwazay par pohnchein jahan se khadim Imran Chishti ki sadarat mein sabhi khawateen khwaja ghareeb Nawaz ki bargaah mein pohnchain aur unhon ney party ki qaumi saddar Sushmita Dev ki kamyabi ke sath sath mulk bhar mein congress ki janib se intikhabi maidan mein utrain khawateen umeedwaroun ki jeet ke liye dua ki aur Ghareeb Nawaz ke astana shareef par neelay rang ki kadhai wali makhmali chadar aur aqeedat ke phool chadhaye .
Khawateen congress ki muqami saddar Saba Khan ney kaha ke hum chahtay hain ke hamari qaumi saddar Sushmita Dev ke sath congress ki sabhi khawateen umeed waar intikhabaat mein jeet darj karayen. hum umeed karte hain ke jeet ke baad Sushmita Dev khud apni chadar lekar Ajmer shareef ayengi. is mauqa par Ajmer khawateen congress ki kayi ohdedaran aur rukan mojood rahen .-YTN STAFF