Security mulazim Jeelani par chocolate ke bahanay ismat raizi karne ka ilzaam. Walidain aur School intizamia ki janib se mulzim ke khilaaf shikayat. mushtayil hujoom ko muntashir karne Police ko halki si taaqat ka istemaal karna pada.
Hyderabad. Golconda Police Station hudood mein Toli Chowki ilaqa mein waqay aik maroof School ki aik saadhay chaar sala ladki ki ismat raizi ki ittila par mutasirah ladki ke khandan walon aur sainkdon logon ne raat mein pur-tashaddud ehtijaj kya. Tafsilaat ke bamawajib PP II mein zair e taleem aik ladki ke waalid ne Golconda Police Station mein shikayat darj karwai ke Azaan International School” ke security incharge Jeelani nami naujawan ne un ki ladki ki ismat raizi ki hai. Ladki ke waalid ne bataya ke jab woh daidh bajey apni bachi ko school se ghar le jany pahonche to ladki ne unhen bataya ke is ke naazuk hisson mein dard ho raha hai. Jab ghar pahonch kar bachi ki jaanch ki gayi toh pata chala ke makhsoos hissa se khoon ris raha hai jis par woh school pahonch kar intizamia se shikayat kiye aur school ke aik teacher ke hamrah aik khangi hospital mein ladki ka muayina karwaya jahan doctoron ne bataya ke ladki ke sath jinsi zayadati ki gayi hai jis par unhon ne Golconda Police Station pahonch kar school intizamia ke khilaaf shikayat darj karwai hai. Police ne ladki ke tibbi jaanch ke liye usay Nilofer Hospital muntaqil kya hai. Ladki ke waalid ne bataya ke yahan doctoron ne bataya ke ladki ke naazuk hisson se khoon ke ikhraj ko roknay ke liye cesarean karna padega. Unhon ne bataya ke ladki ne khud unhen bataya ke school mein garden ilaqa mein exhibition chal rahi thi jahan unhen security par mamoor Jeelani nami naujawan ne usay chocolate dainay ka bahana karte hue school imarat ke aik kone mein le kar gaya aur uss ki ismat raizi karne ki koshish ki. Iss waqea ki ittila milnay ke baad log sainkdon ki tadaad mein school ke bahar jama hogaye aur school ki imlaak ko nuqsaan pahonchaya. Ehtejajyon ke sath huqooq insani karkun bhi jama hogaye aur khaati ke khilaaf sakht karwai ka mutalba kya. Aik ehtajaji khatoon ne jo kaafi barham thi kaha ke school intizamia ko jab is sharamnaak waqea ke baray mein bataya gaya to khaati ke khilaaf karwai karne mein taawun ki bajaye yeh taweel paish karne lagey ke aisa waqea ho hi nahi sakta balkay ladki girgaee hogi jis ki wajah se usay chott aayi hogi. Barham ehtejajyon ne school ke kanch phod diye aur pathrao kya. Barham ehtejajyon ko muntashir karne ke liye Police ko halki si taaqat ka istimaal karna para. school intizamia ki janib se bhi Police mein shikayat karwai gayi jis mein bataya gaya ke school ki aik Taliba ke walidain se Jeelani saakin Nadeem colony ke baray shikayat mousool hui ke is ne ladki ke sath school ke ground mein jinsi zayad-ti ki hai. Ladki ne Jeelani ki shanakht karli hai. School intizamia ki shikayat mein bataya gaya ke jaanch karne par is ke zaireen jama par khoon ke dhabbay paye gaye. Mulzim tafteesh mein taawun nahi kar raha hai. School intizamia ne is maamla ki jaanch karne aur sakht karwai karne ki darkhwast ki hai. school ke paas Police ki bhaari jamiat ko tainaat kardiya gaya hai. Golconda Police ne aik muqadma darj karte hue tehqiqaat ka aaghaz kardiya hai. Bataya jata hai ke Police ne mulzim ko hirasat mein le liya hai. Iss waqea ki ittila paker rukan assembly karwaan mister Kausar Mohiuddin bhi muqam e waqea par pahnch gaye aur ehtejajyon se baat cheet ki aur tayaqun diya ke mulzim ke khilaaf sakht se sakht karwai ke liye Police se numaindagi ki jaye gi