Hyderabad : BJP ke Senior rehnuma aur sabiq markazi wazeer Bandaru Dattatreya ne itwaar ke roz Kaleshwaram lift Aab paashi mansoobay ko ek nakaam mansoobah qarar dete hue ilzaam lagaya ke sarkari khazanay ko isse 80,000 crore rupaye ka bhaari nuqsaan hoga. unhon ne yeh bhi kaha ke K. Chandra Shekhar rao hukoomat ki technical ghalti ne ek bohat bada masla khada kardiya hai. kyunkay is mansoobay ka pani Medigadda Barrage se Kaleshwaram zakheeray mein nakami ki wajah se wapas araha hai.
BJP rehnuma ne ilzaam lagaya ke Kaleshwaram mansoobah ki nakami, wazeer aala KCR ke ek tarfa faislon ka nateeja hai. unhon ne mutalba kiya ke wazeer-e-aala mansoobon ki kharabi par radd-e-amal ka izhaar karen aur riyasat ke logoun ke samnay haqeeqat ko zahir karen.
Unhon ne yeh bhi ilzaam lagaya ke Kaleshwaram project ke baaray mein KCR ka faisla riyasat ke awam ke liye ek laanat ban gaya hai. Dattatreya ne riyasat ke sarkari hospitals ki qabil-e-reham haalat ka masla bhi uthaya.
Sabiq markazi wazeer ne kaha ke Maleria, Dengu bukhaar aur chicken guniya jaisi mousmi bimariyon ke shikaar afraad sarkari hospitals mein sahuliyaat ki Adam dasteyabi ki Wajah se munasib ilaaj nahi kar wa rahay hain.
Dattatreya ne kaha ke bohat saaray ghareeb log tibbi imdaad mein towsee karne mein hospital hukkaam ki ghaflat ki wajah se mout ke mun mein chalay ja rahay hain. unhon ne mutalba kiya ke reyasti hukoomat tamam dehaat ke makeeno ko saaf pani muhayya kare aur riyasat ke qabeeloun mein kambal taqseem kere. –YTN STAFF